نص حوار السيسي مع الإعلامية زوريال إدوالى.. عن إرادة المصريين وتعايشهم المشترك (فيديو)

الرئيس السيسى: "أنا بخير وبرحب بيكى وأنا سعيد جداً بهذه المهارة والملكات فى سن الشباب ده.. أنا بهنيكى وسعيد بيكى ودى رسالة جميلة للشباب والشابات فى العالم كله".

زوريال إدوالى: "شكراً جزيلاً وأنا أقدر ذلك.. والآن لدى بعض الأسئلة لمعاليك.. إفريقيا تمر بعصر النهضة وقادتها يتولون زمام الأمور وأنا سمعت بالفعل قصص نجاح من رؤساء بلدان ككينيا وتنزانيا ورئيس موزمبيق ورئيس نيجيريا وتحدثت عن تغييرهم لبلدانهم.. والآن حان الوقت للاستماع لقصة مصر.. معاليك كرئيس مصر هل لك أن تقول لنا كيف تعمل على تحويل هذا المجتمع الكبير المتنوع؟".

الرئيس السيسى: "أحنا فى مصر لينا قصة بنسميها حكاية وطن.. الحكاية هنا فى مصر مش حكاية قيادة وحكومة.. الحكاية فى مصر حكاية شعب.. الشعب ده أصر على أنه يغير الواقع بتاعه لواقع أفضل.. المهم وهو بيتحرك فى ده كان مستعد أنه يدفع ثمن التطوير والتقدم ويتحمل المشاق اللى هتترتب على كدا.. الشعب ده رفض الفاشية ورفض التمييز على أساس دينى ورفض التطرف ورفض الغلو واتحرك بالملايين علشان يقول أننا لا يمكن أبداً أننا نكون دولة غير دولة محبة لنفسها وشعبها والعالم كله".

وتابع الرئيس: "المؤتمر اللى بندعو فيه شباب العالم ده هى رسالة سلام من كل المصريين وشباب مصر للعالم كله وشباب العالم كله على أن الشعب المصرى شعب سلام وأمان واستقرار وشعب محب للآخرين لكل الآخرين.. اللى أنا عاوز أقوله أن المصريين هما الحكاية الكبيرة مش أى حد تانى.. البرنامج كله عملوه المصريين وتحملوا ويتحملوا.. النهاردة إحنا بنتكلم على إجراءات اتعملت خلال 4 سنين وشوية.. لكن خلال الـ4 سنين دول المصريين عملوا جهد جبار فى كل المجالات.. فى مواجهة التطرف والغلو والإرهاب فى إعادة بناء الوطن فى التنمية فى حل المشاكل اللى بقلها سنين طويلة فى مصر.. وقعدت فترة كبيرة ومكنش فيه فرصة لحلها نجح بنسبة كبيرة جداً.. والاختبار الكبير فى ده وأكد ده أن مجموعة الإجراءات الاقتصادية.. الخطة بتاعتنا فى الإصلاح الاقتصادى لم تكن أبداً ليتم مرورها أو النجاح فيها إلا بأن المصريين يتحملوا كل المصاعب الناتجة عنها".

واستكمل الرئيس: "عاوز أقول لكى.. مخرجش حد يقول أو يعترض على الصعوبات المعيشية الكبيرة اللى صدفت الناس فى هذه الإجراءات.. الكلام اللى أنا عاوز أقوله فى هذه النقطة السؤال فى ده وإجابته أن المصريين إرادتهم هى اللى نجحت المسار الذى نسير فيه.. تحملهم والتمن اللى بيدفعوه هو اللى نجحنا.. أو مازل نجاحنا مبنى على إرادة المصريين بالمناسبة عدد الشباب أو من هم دون سن الـ40 كتير.. إحنا تقريباً عددنا 100 مليون منهم 65 تحت سن الـ40 شباب كتير مصر على أنه يغير وبيدفع تكاليف هذا التغيير للأفضل.. التفاصيل كتير ومش عاوز اشغلكم واللى بيسمع منى.. لكن أقدر أقول أن الحكاية كلها فى كافة مناحى حياتنا فى مصر اتحركنا والشعب المصرى ساند هذا التحرك.. وبذل ويبذل وسيبذل جهودًا ضخمة من أجل تغيير الواقع.. والواقع ده بالمناسبة محل تقدير من شعوب العالم المتابعين للشأن المصرى بشكل عام عندهم تقدير وإحساس بالجهد اللى اتعمل ومدى الإنجاز اللى حققه المصريين.. علشان كدا منقدرش نختزل النجاح اللى حصل خلال الـ4 سنوات اللى فاتة دول فى حد.. لا.. هى أمة كاملة.. أمة تتحرك وصامدة ومصرة على العبور لآفاق رائعة للمستقبل إن شاء الله".

 زوريال إدوالى: "هذا رائع لأنه يظهر قدرة البلد على التوحد.. باعتبارى صانعة أفلام صغيرة عملت فى هوليوود والإعلام الإلكترونى.. أنا دائماً أتساءل لماذا إفريقيا غير متواجدة فى تصوير وإنتاج الأفلام ذات الميزانية الكبيرة.. رئيس غانا ورئيس موزمبيق تحدثوا إلى وسألونى عن إمكانية مساعدة بلدهم.. وأنت كرئيس مصر ولديك معلومات عن جمال بلدك ما هى الجوانب فى مصر التى تريد أن يعرفها العالم من خلال الأفلام ومن خلال السينما؟".

الرئيس السيسى: "مصر دولة قديمة جداً فى أعماق التاريخ، بدءًا من العصر الفرعونى منذ أكثر من 5 آلاف سنة مروراً بالحقبة اليونانية والحقبة الرومانية وحتى الحقبة الإسلامية.ز ده تنوع كبير بتتميز به مصر وعمق حضارى وثقافى جداً.. اللى أنا عاوز أقوله فى الإجابة على هذا السؤال.. التحديات اللى قابلت مصر فى الفترة اللى فاتت دى أبرزها كان الإرهاب والتطرف وأنا أتصور أنه بيقابل العالم كله كمان لما نيجى نشوف الأحداث اللى بتتم فكل يوم نجد فى دولة يحدث فيها أمر من الأمور اللى بتألمنا كلنا".

وتابع: "الجديد فى مصر اللى أنا أقدر أنا أقدر أقول أنه علامة مضيئة جداً جداً بتخرج وهتخرج من مصر للعالم كله هو أن التعايش المشترك بين المصريين بعضهم البعض.. فى مصر الآن منقدرش نقول أبداً أنحنا مصرى مسلم ومصرى مسيحى.. منقدرش نقول كدا دلوقتى.. بقا ده إساءة للنسيج المصرى اللى بيعتبر نفسه كتلة واحدة.. أنا أتصور أن دى أبرز.. يعنى أى إنجاز مادى يتعمل إصلاح اقتصادى أى شكل من أشكال العمل والإنجازات اللى ممكن تتحقق.. أنا أتصور أن أكبر إنجاز موجود هو الروح الموجودة لدى الشعب المصرى.. أنا بتكلم عن الشعب المصرى مش بتكلم عن النخب والمثقفين.. أنا بتكلم عن الناس العاديين الماشيين فى الشارع عندهم هذا الإحساس وهذه الممارسة من محبة الآخر".

الرئيس السيسى: "وزى ما أنا قلت فى بداية الكلام المؤتمر ده هو رسالة مثل ذلك.. أننا بنقول للناس أننا لازم نكون مع بعض.. الأمر الرائع عندنا فى بلدنا فى مصر.. أن ده بقى سمة للشعب المصرى كله أنه يجب بعضه ويحترم بعضه ويحترم الاختلاف والتنوع سواء كان دينى أو أى حاجة تانية.. ده أتصور أن أكتر حاجة أسجلها فى تقديرى أنا كإنسان مصرى مش رئيس لمصر هى النقطة دى.. لأن النقطة دى موجودة لدى كل المصريين بشكل يتطور كل يوم إيجابياً عن اليوم اللى قبله.. وأتصور أن ده هيخرج من بلدنا مصر إلى بقية العالم كله".

- زوريال إدوالى: "أنا اعتقد أن منتدى شباب العالم مبادرة رائعة وأعتقد مما سمعت أن مصر لها تاريخ كبير يجب أن يحكى والآن إفريقيا بها شباب كثيرين وكذلك مصر.. ما هى الرسالة التى تقدمها معاليك إلى شباب العالم وكيف تود أن تذكر فى التاريخ؟".

الرئيس السيسى: "الرسالة اللى ممكن أقولها لأى شاب مش بس فى مصر ومش بس فى إفريقيا.. الشباب هو الأمل الشباب هو المستقبل الشباب هو القدرة وبالتالى الحياة أمام كل الشباب ولازم هو بيقا مدرك لكدا ويعمل من أجل هذا.. وأبداً مهما كان فيه مصاعب أو عراقيل لا يفقد الأمل فى نفسه أو أنه قادر على أنه ينجز ويعمل الأفضل.. و أنا عاوز أقول مثال.. وهقول مثال ليه إحنا فى وجودك معانا والحوار اللى أنت بتجريه.. أنا مش بجاملك.. أنا بقول لكل اللى بيسمعنا ويشفنا فى وسط كل الظروف الصعبة الموجودة فى إفريقيا وموجودة فى مصر بردة والظروف الموجودة فى كل بلادنا على كل حال.. لكن فيه شباب مصر على أنه يغير وينجح ويبذل جهد ويحلم ويحقق حلمه.. اللى أنا عاوز أقوله لكل شبابنا فى إفريقيا ومصر الأمل فيكم وليكم.. فيكم وليكم.. أوعو أبداً تفقدوا ثقتكم بأنفسكم ولا بالمستقبل اللى أنتم ممكن تحققوه بس دائماً الأمر محتاج جهد وصبر.. جهد وصبر.. وأتمنى الناس تفتكرنى بأيه.. تفتكرنى أننى قدمت عمل صالح عمل طيب لشعبى والبشرية كلها ده اللى أنا بتمنى يتذكرونى بيه".

الرئيس عبد الفتاح السيسى: "أنا الحقيقة لخصت الكلام كله أننا فى مصر هنا دولة سلام ومحبة وحريص على أنها تبرز وتصدر للعالم كله الأمن والسلام والمحبة بين الناس كلها".

- زوريال إدوالى: "مجدداً شكراً سيدى الرئيس على إعطائى الفرصة للحديث معك لقد كان هذا شرفًا كبيرًا سيدى معى كتاب أهديك لك.. فى أمريكا هناك ناشر يكتب عن الناس الذين يعيشون عيشة ملهمة وأنا كنت سعيدة بقراءة هذا الكتاب وسأهديه إليك.. وإذا فتحت الكتاب فى الصفحة الأولى ستجد رسالة لك".