كأس العالم!
الأحد، 15 أكتوبر 2017 02:00 م
محمد الرفاعى يكتب:
• بعد 28 سنة خدمة فى ملاعب أفريقيا- واللى شبه غيطان الدرة- وصلنا كأس العالم، هى دى مصر يا عبلة.
• أن تفك نحس 28 سنة، سهل، الصعب كان فك نحس كوبر!
• حد يخطف رجله يا جماعة والنبى، يطمن على أبوالكباتن مجدى عبدالغنى، ليكون جراله حاجة!
• قرر لاعبو المنتخب، التبرع بالمليون ونصف التى منحها الرئيس السيسى لكل لاعب، لصالح صندوق تحيا مصر، لتطوير العشوائيات.. رجالة يا كباتن.. ويا ناس يا شر.. بطلوا قر!
• بعد ما شربنا كأس العذاب والضنا.. وصلنا كأس الهنا!
• نشرت الصحف المصرية، أن نائبة برلمانية حصلت على 2٫7 مليون جنيه، نظير بيع 75 تأشيرة حج، وحتى الآن، لا حس ولا خبر، ويا نواب الهنا.. يا ريتنى كنت أنا!
• على عبدالعال توعد من يحاولون تشويه صورة البرلمان فى الداخل والخارج، وقال بالفم المليان: «ساعة الحساب قد حانت خلال الأسابيع المقبلة»، يا حاج عبدالعال.. مش واخد بال سعادتك.. إن اللى بيشوه صورة البرلمان، هم بعض النواب المحترمين؟!
• «القومى لحقوق الإنسان:»: رصدنا تراجعات غير حميدة والتعذيب مستمر، «المصرى اليوم»: لا تعذيب ممنهج، «الأهرام»: كل واحد وعلامه بقى!
• بعد ارتفاع أسعار كروت الشحن.. التكنولوجيا فى العالم كله لإسعاد الناس، فى مصر لا مؤاخذة.. للتنكيد على الناس وخراب بيوتهم.
• هانى شاكر غنى عيد ميلاد جرحى أنا، مطرب خليجى غنى: مبروك للحزن، يا خوفى يا بدران، لا يطلع مزاجنجى تانى يغنى.. يا أهلا بالمدافن.. وجتتى فى المجاورين.. وعفريتى فى البساتين.
