أول تعليق من عمرو يوسف بعد شائعة ضبطه وزوجته بـ«مخدرات»

طمأن الفنان عمرو يوسف جمهوره على السوشيال ميديا، بعد تداول شائعات القبض عليه، صباح اليوم السبت، واصفاً هذه الشائعات بـ«السخيفة».

وقال عمرو يوسف، في فيديو بثه عبر حسابه الرسمي على موقع التواصل الاجتماعى «فيس بوك»: «صحيت النهاردة الصبح على خبر بايخ جداً وغريب جداً، كاتبين على أحد المواقع أنه تم القبض عليا أنا وزوجتي في القاهرة، ومعانا أقراص مخدرة، طبعا الموقع ده المفروض أنه موقع محترم وكبير وله اسمه».

وتابع: «مبدئياً كنده مراتي في الجونة، واللي متابعنا على السوشيال ميديا بقالنا فترة قاعدين في الجونة، وأنا رجعت امبارح وهي لسه هناك، عشان كان عندي اجتماع شغل، امبارح والنهاردة وهسافر تاني، الموضوع مالوش أي أساس من الصحة، صحيت النهاردة لقيت الخبر زي الناس بالظبط، لقيت واحد صاحبي بيصحينى الحق ده في خبر كذا كذا».

وأضاف عمرو يوسف، قائلاً: «بعمل الفيديو ده عشان 3 حاجات أول حاجة عاوز أطمن كل الناس اللي بتسأل عليا والتليفونات الكتيرة اللي مش عارف أرد عليها كلها، بشكركم جدًا أنا زي الفل وما فيش أي حاجة وكندة في الجونة واحنا زي الفل».

وتوعد عمرو يوسف ناشر الشائعة قائلاً: «تاني حاجة كل موقع أو صحفي كتب من غير ما يتحرى الدقة أو يتأكد من الخبر، أنه صح أو غلط، في قضايا، تترفع علشان نجيب حقنا بالقانون».

وأنهى عمرو يوسف حديثه قائلاً: «رقم 3 بشكر كل صحفى محترم أهتم وكلمنى وأنا رديت عليه وأتاكد إنه مفيش أى حاجة وأنا فى البيت مفيش أى مشاكل خالص وبشكركم جدًا إنكم اهتميتوا وكتبتوا الأخبار الصحيحة مش الغلط، بشكركم جدًا وأنا كويس جدًا وكندة زى الفل وصباح الفل عليكم».

ونفى الفنان عمرو يوسف شائعة القبض عليه وزوجته الفنانة كندة علوش، بمنطقة العجوزة وبحوزتهم مواد مخدرة، وذلك وفقا لما تتداولته بعض المواقع دون تحري الدقة، مؤكدًا على أنها شائعة وليس لها أساس من الصحة.