خبط بالعقل.. بشرة خير البنك المركزي يعلن ارتفاع الاحتياطي الأجنبي.. «التموين» تقرر زيادة المنتجات المطروحة بالبطاقات لـ66 سلعة.. حكم بحبس مدير مكتبة الإسكندرية السابق3سنوات..الفيس بوك فى خطر لأنه مرمى النيران

«التموين» تقرر زيادة المنتجات المطروحة بالبطاقات لـ66 سلعة

ابعد عن كارفور وعن هايبر..التموين عملتلك «أوفرز» كتير أوييي..عارفين هي أيه؟..هقولك..غمض عينك تاكل ملبن..."التموين" تقرر زيادة المنتجات المطروحة بالبطاقات لـ66 سلعة.. إضافة المنظفات وزيت الذرة والعسل واللبن والتونة والخضراوات المجمدة.. ومخاطبة شركات البطاقات الذكية لإدراج المقررات الجديدة اعتبارا من الشهر الجارى..وياصلاة الزين يا صلاة الزين..أنا كمواطن عادي أشعر بالإنشحاك الذاتي إنني ببطاقة التموين هقدر أجيب كل اللي انا عوزاه..دية الدولة مدياني 50 جنيه هنشهيص الدنيا.

حكم بحبس مدير مكتبة الإسكندرية السابق 3 سنوات و6 أشهر

ما هي كانت بزرميطة بقي وكدة..كل واحد مسنود كان بيعمل اللي هو عوزة يعين يرفد ويشيل ويحط كمان بمزاجه بقي..المهم بقي  حكم بحبس مدير مكتبة الإسكندرية السابق 3 سنوات و6 أشهر.. 3 اتهامات وجهت لإسماعيل سراج الدين أبرزها إساءة استخدام السلطة ومخالفة القوانين فى التعيينات.. وتحريك دعوى جنائية ضد سوزان مبارك لثبوت تورطها معه..حتي أنتي يا أم علاج وجيمي.. مكنش العشم والله..

بشرة خير البنك المركزي يعلن ارتفاع الاحتياطي الأجنبي

وأخيرا خبر يفرح غير زيادة الأسعار وكدة ههههههههههه..البنك المركزى يعلن ارتفاع الاحتياطى و7.8 مليار دولار تدفقات للبنوك..يعني دية حاجة حلوة ولا وحشة؟..طبعا حاجة حلوة وفي احتمال ان اسعار الدولار هتنزل والدهب والسلع والكلام دة كله..يعني دية بقي بشرة خير هههههههههه..

فيس بوك في مرمى النيران بسبب خطاب الكراهية

لما طلع الفيس بوك من كام سنة كدة كان تطور غير طبيعي في كل حاجة إيه دة أقدر أجيب اهلي الي في البلدان التانية بسهولة ونتواصل..المهم بقي إنه  أصبح ملتقي للإرهابيين والتنظيمات المتطرفة وحاجات غريبة اوي بتحصل بسببه..وعشان كدة فيس بوك فى مرمى النيران بسبب خطاب الكراهية.. واشنطن بوست: الموقع يتبنى معايير غير واضحة ومنحازة فى تحديد المحتوى السيئ.. والأقليات الدينية تشكو عدم قدرتها لكشف ما تتعرض له من هجوم بسبب سياسة مارك زوكربيرج..بس خلاص..