فى انتظار الموت
الأحد، 23 يوليو 2017 10:00 ص
مقبره
أحمد الخطيب
1- حاله اتبدل من ساعة موت مراته.
2- بقى بيخاف من الليل.. جلده بيتنفض لما الشمس تروح وتغيب.
3- طلع ع المعاش من سبع سنين.
4- بناته متجوزين.. عايش لوحده.
5- بيصحى الساعة 5 الصبح.. وبياخد أقراص مُنومة عشان يعوّد نفسه ع النوم الساعة 7 المغرب.
6- أول ما يصحى، بيروح المطبخ، يفتح علبة فول دمياطى، يقطع فحلين بصل، يشد كام رغيف عيش مصرى من الفريزر، ويفطر فى البلكونة.
7- بيقضى يومه كله ف البلكونة..مبيخرجش من البلكونة إلا على النوم أو للحمام.
8- ساكن ف الدور التالت.
9- دوشة الشارع كانت بتدفى صدره.
١٠- بيتابع النقاشين اللى شغالين ف العمارة اللى قصاده..بياع اللبن وهو بيتنطط من عمارة للتانية..العربيات الملونة اللى بتقف قصاد محل الورد وبتنزل منها بنات حلوة.
11 - بيبقى مبسوط لو حد من جيرانه سلّم عليه من الشارع.. بيشاورله يقرب وبينزله السَبَتْ.. السَبَتْ بيبقى مليان شيكولاتة وورد.
١١- بيتغدا تونة وجرجير وبصل أحمر.
١٢- مبيعرفش يهضم إلا على كرسيه الهزاز وف ايده كوبايه الشاى الحبر وف التانية سيجارة بلدى.
١٣ - تيجى الساعة 6 من هنا ويبدأ يجهز نفسه للنوم.. بيقفل البلكونة..بيغطى كرسيه الهزاز.. بيتأكد إن باب الشقة متربس وانبوبة البوتاجاز مقفولة ومحبس الميه مشدود.
١٤- قبل ما ياخد حباية المنوم بيتأكد إن الظرف اللى فيه فلوس خارجته ووصيته ونعيه ف الجرايد موجود فوق الكوميدينو اللى جنب رأسه.
١٥ - بيشغل معطر الجو الإلكترونى.. بيتكلفت بكفنه الأبيض.. بيعد من واحد لخمسين وينام.
