خبط بالعقل..العبي غيرها يا قطر.. أسعار العيش هتبقى في العلالي.. الجيش المصري الـ10 عالميا.. 40 دقيقة من الصوت العالي بين رئيس أمريكا ورئيس روسيا
الأحد، 09 يوليو 2017 08:57 م
40 دقيقة من الصوت العالي بين رئيس أمريكا ورئيس روسيا
40 دقيقة فاصلة في علاقة الرئيس الأمريكي بالرئيس الروسي..أصلهم صوتهم طلع وكانت هتبقي فضيحة في اللقاء اللي حصل ما بينهم انهاردة..الدنيا قامت زمقعدتش بيتكلموا في اللي فات وسيبين اللي بيحصل دلوقتي..تخيل الخناقة كانت لية؟.. عشان الرئيس الروسى شكك كذا مرة في مصداقية المعلومات الاستخباراتية الأمريكية اللي بتقول أن روسيا تدخلت في الانتخابات الامريكية عشان ترامب يكسب.. بس الحمد لله الدنيا هديت ما بينهم..بجد؟..أه والله..طب إزاي؟..لما وزير الخارجية الأمريكية طلب منهم يقفلوا علي اللي فات ويتكلموا عن الأزمة السورية..إللي هو الدم والتشرد والقتل اللذيذ بالنسبة ليهم طبعا..ناس دموية بصحيح.
العبي غيرها يا قطر
في مثل قديم كدة بيقولك " تجيب .... تلهيك واللي فيها تجيبوا فيك"..أهو دة إللي قطر بتعملوا مع الوطن العربي كله.. المهم بقي رسالة إلي قطر «العبي غيرها» عشان الجزيرة بتحاول غسل يدها من الدماء..وعملت إعلان فيه أشهر المذعيين اللي كانوا في القناة، وعملوا إعلان بيقولك إيه بقي؟.." إلى أولائك الذين يطالبون بإغلاق الجزيرة وإسكاتها إلى اللذين يحاولوا منع الحقيقة والخبر الصادق نحن أيضا لنا مطالب نطالب أن يتمتع الصحفي بحقه في ممارسة عمله دون مضايقات أو تهديد نطالب أن يحفظ الناس حقهم في الوصول إلى المعلومة دون انحياز ولا تدليس نطالب بإسماع صوت المهمشين والمنسيين في أصقاع العالم نطالب بعرض الأراء المتباينة وتقبل وجهات النظر المختلفة دون خوف نطال الا يعامل الصحفي كالمجرم، نطالب أن تبقى الصحافة حرة"..تخيل البجاحة.. فعلا ناس مفرقة الجماعات واللذات..منك لله.
الجيش المصري يصنف الـ10 عالميا
تسلم الأيادي تسلم يا جيش بلادي..عاش اللي قال الرجال عدوا القناة.. بسم الله والله بسم الله ..لو مت يا امي متبكيش راح اموت عشان بلدي تعيش..فدائي فدائي اموت اعيش ميهنيش..عدي النهار والمغربية جاية.. خالي السلاح صاحي صاحي صاحي..عارف اغاني بتهز جسمك وبتعرفك أد ايه الجيش المصري حاجة عظيمة..وبالاخص لما بنلاقي إن الجيش المصري يتقدم في تصنيف أقوى جيوش العالم ويحتل المركز العاشر عالميا..الله واكبر عليكم يا خير أجناد الأرض.
زيادة في أسعار الخبز
هو كله ضرب ضرب مفيش شيتمة خالص ولا إيه؟.. دة بي إللي الشعب المصري نفسه فيه يتشتم عارفيين ليه لان كل يوم بيضرب..بنزين يغلي ونسكت وكل السلع تغلي ونعيش علي العيش الحاف..لكن المفاجأة بقي إن العيش كمان هيغلي..أصل أنهاردة اتحاد الغرف التجارية وشعبة المخابز يتفقان على زيادة تكلفة صناعة الخبز..تخيل الصدمة لا صدمة ايه إحنا كاننا مضروبين بالجزمة علي دماغنا..عارف لو المرتبات زادت الفقر قل ممكن نسحمل عادي وهنعيش عشان ناكل وبس..لكن كله بيغلي بدون ما نزيد في مرتباتنا أو معاشتنا..الله يكون في عون الشعب المصري اللي بينام متوسط الدخل يصحي يلاقي نفسه مش محدود لا معدوم الدخل..لكم الله.
أول مصنع مصري للأحذية الرياضية
لو بتجيب كوتشيات من أغلي الماركات وبتريحك ..وطبعا بعد غلاء الأسعار مبتقدش تقدر تدفع ربع تمنه..في أول مصنع مصري للأحذية الرياضة..هيتعمل في مدينة نصر..وهتبقي اسعاره كويسة في مقدرة الجميع والأهم إن الأحذية دية هتبقي بجودة عالية جدا..اهو لاقينا حاجة تفرحنا..أقعدوا بالعافية.
