دنيا سمير غانم تدعو للتبرع لـ«اليونيسف» لتخفيف معاناة الأطفال اللاجئين

دعت الفنانة دنيا سمير غانم، متابعيها عبر حسابها الشخصي بموقع تبادل الصور والفيديوهات «إنستجرام»، بالتبرع ودعم اليونسيف لتخفيف معاناة الأطفال اللاجئين.

وكتبت «دنيا» عبر حسابها الشخصي: «كل يوم أطفال كتير مجبرين يخرجوا من بيوتهم وبلادهم على أمل يلاقوا الحياة والأمان في بلاد تانية بعد ماضاع الأمان من بلادهم».

وأوضحت قائلة: «اللاجئين مشكلتهم بتزيد مش بتقل، فيه تقرير جديد ليونيسف بيقول إن عدد الأطفال اللاجئين اللي بيسافروا لوحدهم اتضاعف 5 مرات من 2010.. متخيلين يعني إيه أطفال تتساب لوحدها في البحر وتواجه الرعب والموت لأنهم مش قادرين يعيشوا حياة طبيعية #زي_كل_طفل؟ نفسي الناس كلها تعرف المعاناة والمخاطر اللي بيتعرض لها الأطفال اللاجئين بسبب الحروب والصراعات اللي بتهدد حياتهم وتخليهم عرضة للموت ده غير الاستغلال الجنسي في الهجرة غير الشرعية، وبتهدد كمان مستقبلهم مع عدم وجود عائل ليهم أو ضياع فرصتهم في التعليم أو انعزالهم عن المجتمعات الجديدة اللي بيعيشوا فيها».

وتابعت قائلة: «أنا بدعي ربنا واحنا في الشهر الكريم إن السنة الجاية تكون أحسن للأطفال اللاجئين ولكل الأطفال في العالم، وإحنا لازم نعمل اللي نقدر عليه واللي يحب يتبرع ويدعم مجهود اليونيسف لتخفيف معاناة الأطفال».