«الشبشب المقلوب حرام والعصفورة قالتلي».. أشهر 9 أكاذيب أبوية

تمتلىء حكايات طفولتنا وصبانا بحكايات وحكاوي الجدات والأمهات، الغريبة واللطيفة في نفس الوقت، وحكايات خرافية وأحلام وردية ومأثورات شعبية، وكثيرا ما كان يتعامل الأهل مع الأطفال بشئ من المبررات الساذجة لمجموعة من الحقائق العلمية علي أساس أن الأطفال من السهل عليهم تصديق ما يقال لهم من الأهل أتعرف على 10 حاجات أضحك علينا بيهم واحنا صغيرين.

- الحسنة دي بتطلعلك لما بتعمل حاجة كويسة

«الحسنة» هي بقعة لونها بني بتظهر على بشرتنا لأسباب علمية مختلفة، لكن للأسف أهالينا كانوا دايماً بيقولولنا إنها بتظهرلنا لما بنعمل حاجة كويسة عشان يريحوا دماغهم من الدخول في التفاصيل اللي عمرنا ما كنا هنفهمها وإحنا صغيرين.

- لازم تخلص طبقك كله عشان الملايكة تدعيلك

وعشان بقي يخلونا نأكل أكلنا كله ، كانت هذه الكلمة المأثورة وكنا مصدقين أن الملايكة، بس لما كبرنا بنفتكر الجملة وبنحب أن الملايكة بتطوف حولينا واحنا بنأكل.

- الشبشب المقلوب حرام

واحدة من أشهر الحاجات اللي كلنا صدقناها واحنا صغيرين هي إن «الشبشب المقلوب حرام»، وحتى الآن هناك من يصدق في هذه المقولة التي لا تندرج تحت أي أسباب منطقية.

- الناس دول موجودين في التليفزيون من ورا

بنفس فكرة الإستسهال وترييح الدماغ ولأننا عمرنا ما كنا هنفهم غير كدة، لما كان حد فينا بيسأل أهله وهو صغير عن حقيقة الأشخاص اللي بيظهروا في التليفزيون كانوا دايما يردوا علينا ويقولولنا دول موجودين جوة التليفزيون أو في التليفزيون من ورا وطبعا كنا بنصدقهم.

- لو عملت حاجة غلط هحبسك في أوضة الفئران

«أوضة الفئران» هي واحدة من أشهر طرق العقاب عند الأهالي، كانوا دايماً بيستغلوا خوف الأطفال من الفئران ويهددونا بالأوضة  الضلمة.

- العصفورة قالتلي

«العصفورة قالتلي» هي الإجابة اللي كلنا سمعناها من أهالينا واحنا صغيرين لما كانوا بيحبوا يواجهونا بحاجة عملناها لكن من غير ما يعرفونا مين اللي قالهم وبرضه كنا بنصدقهم.

- اللعب بالمقص بيجيب النكد

هذه من المقولات المأثورة التي ليس لها أي سند علمي وهو معتقد موجود حتى الآن

- ارمي السنة المخلوعة للشمس عشان تطلع الجديدة

مين مننا معملش كدة وهو صغير؟ كلنا غنينا «يا شمس يا شموسة خدي السنة دي وهاتي سنة العروسة»، ورمينا السنة المخلوعة للشمس واستنينا تبعتلنا الجديدة.

- لو كدبت مناخيرك هتطول

ساعد كرتون «بينوكيو» كتير من الأمهات على استخدام كدبة جديدة يصدقها الأطفال وهي أن مناخيرهم هتطول لو فكروا يكدبوا زي ما كان بيحصل في الكرتون، وده طبعا كان عشان يخلونا نقول الحقيقة ونبعد عن الكدب.