خبط بالعقل.. بتوع التعليم «جم يكحلوها عموها» وأمير كرارة لبس «كلبش» المحامين
الأربعاء، 31 مايو 2017 08:00 م
وزارة التربية والتعليم تنصح طلاب الثانوية العامة بالاهتمام بنظافتهم الشخصية
«جوم يكحلوها عموها» عارف انت المثل دة طبعا اللي بيتقال لما حد ينيل الدنيا خالص، اللهم لا حسد، وزارة التربية والتعليم طلعت بيان بتقول فيه إيه بقى؟..توجه نصائح لطلاب الثانوية العامة عن الامتحانات المهم بقي بتنصحهم بإيه؟.. اهتم بنظافتك الشخصية، جهز أشياءك ليلة الامتحان كويس، استخدم القلم الجاف الأزرق الرصاص في الرسم بس، متخدش معاك التليفون اللجنة سيبه في البيت ملوش لازمة وهيضرك، وأنت خارج من الامتحان مش تراجع حاجة «اللي أنت هببته هبتته خلاص ملوش لازمة».. مش تنسى بعد ما تروح تشكر أبوك وأمك وتبوس إيدهم، ده طبعا بدلا من الإهتمام بالمذاكرة الجيدة وإن الإمتحان هيجي في مستوي الطالب العادي..أصل الكلام دة أنا كنت بسمعه من 10 سنين وأنا في إمتحانات الثانوية العامة..فعلا إحنا أتغيرنا أوي.. وشكرا والسلام عليكم ورحمة الله وبركاته.
بلاغ ضد أمير كرارة بعد تقليله من مهنة المحاماة
أمير كرارة في مأزق كبير.. تقدم تامر سيف المحامي ببلاغ إلى النائب العام يطالب من خلاله بوقف عرض مسلسل "كلبش" واستدعاء الفنان أمير كرارة عشان أمير قال إييه بقي «محامي بـ 3 تعريفة يطلعه براءة» فالكلام دة خالا الدم يضرب في دماغ المحامي وطلب بوقف المسلسل..أينعم مهنة المحاماة أشرف المهن ولها قدسيتها..بس في نفس الوقت أكيد في ناس مش كويسين هما إللي بوظوا سمعت المهنة يا كبير..مش كدة ولا إيه؟..
الأكشن هو المسيطر علي سباق مسلسلات رمضان
ولا بعودة يا رمضان..ومسلسلاتك كمان إللي بنستناها من السنة للسنة..السباق السنة دية شديد حبيتين..بعد مرور 4 ايام من رمضان الاكشن هو اللي مسيطر علي الدراما السنة دية يعني مثلا مسلسل "الزيبق" لكريم عبد العزيز و "الحصان الاسود" لاحمد السقا "كلبش" لامير كرارة متصدرين القائمة..أما " ريح المدام" لاحمد فهمي و"في اللا لا لاند" لدنيا سمير غانم و "خلصانة بشياكة" مكسرين الدنيا في الكوميدي..وفي النهاية أحب أقولكم إن التقييم دة في اليوم الرابع وإحنا لسة مكملين ومش ساكتين عارفين ليه؟.. عشان ناق 25 يوم لسة..
مخك في خطر.. لو منمتش 7 ساعات خلايا مخك هتاكل نفسها
نصيحة علي الماشي.. كلنا في رمضان مش بنام كويس..صح ولا إيه؟.. الناس الي بتنام كويس متقراش الكلام إللي جاي دة لأنها حاجة متخصهمش من الأخر..أما بقي إللي مبينموش كويس "زي حالاتي" إيه إللي هيحصلك؟..خلايا المخ هتأكل نفسها..يعني بعد فترة هتبقي مش بتركز ولا قادر تفكر ولا إي حاجة خالص..الخلاصة إيه بقي إنك لازم تحاول تناول 7 ساعات يوميا..أقعدوا بالعافية
اقرأ أيضاً:
