خبط بالعقل.. برومو رامز جلال يقلب اليوتيوب.. قضية خالد علي طلعت جد مش هزار.. أما مرات ترامب لبست الحجاب بالفاتيكان احتراما للبابا بس ملبستوش بالسعودية ده معناه إيه؟ العثور على سفينة نوح هي كانت تايهة ولا إيه؟
الخميس، 25 مايو 2017 11:18 م
رامز جلال قالب الفيس بوك ببرنامجه الجديد
** كل سنة في رمضان بستنى نشوف رامز جلال عامل مقلب إيه؟.. وكل سنة بنقول إن المقلب صعب جدا وصعب حد يستحمله لأن المقلب بياخدك من الحياة للموت ثم الرجوع للحياة مجددا.. تحس كدة إن رامز بيربينا وبيخلينا نتوب.. المهم بقى إن مقلب السنة دية نجح من قبل مانشوفه أصلا.. أصل البرومو بتاعة شافه أكتر من 8.5 مليون شخص.. ودة بقى في أقل من 12 ساعة.. ودة معناه إن رامز زي كل سنة كسب وضمن الحصول على أعلى نسبة مشاهدة.. أينعم أفكار رامز صعبة.. بس أهيه بتوب الواحد لأن أصعب إحساس إنك تكون معرض للموت وواثق من دة وفي الأخر تعيش تاني.. ربنا يخليك يا راموزة وتوبنا كمان وكمان.
قضية خالد علي طلعت جد مش هزار
**شكلها قلبت جد ولا إيه؟ إحالة الناشط خالد علي الي محاكمة عاجلة يوم الإثنين المقبل أمام محكمة جنح الدقي بتهمة فعل إشارات غير لائقة على أن يتم الافراج عنه بكفالة ١٠٠٠ جنيه حتى الإثنين المقبل والعقوبة المتوقعة في حالة إدانته قد تصل إلى سجن ٣ سنوات.. إيه ده إحنا كنا فاكرنها شدة ودن.. واللي كنا فاكرينه هزار قلب بجد.. كله سلف ودين يا علي.
ميلانيا ترامب تلبس الحجاب وهي دخلة علي بابا الفاتيكان وملبستوش في السعودية..دة أسمه أيه؟
**إلى ميلانيا ترامب.. مش اللبس المحتشم بس هو أصول وعادات المملكة السعودية لا كمان الحجاب.. سيذكر التاريخ انكي ذهبتي إلي السعودية مكشوفة الشعر بينما دخلتي علي بابا الفاتيكان محجبة ومغطية شعرك ولابسة حشمة..دة معناه إيه؟.. أه احترمتي السعودية أول يوم لانك لبستي فستان طويل بس تاني يوم لبستي قصير.. بس نقول إيه؟
العثور علي سفينة نوح..هي كانت تايهة ولا ايه؟
** صدق أو لا تصدق.. أعلنت مجموعة من العلماء الصينيين والأتراك العثرو على بقايا لسفينة نوح ودة اللي قالته «وكالة سبوتنيك الروسية».. وقالت كمان إن بقايا السفينة موجودة على جبل «أرارات» ومغطاة بطبقة سميكة من الثلج والرواسب البركانية.. وتم العثور على هذه البقايا على ارتفاع 400 متر عن سطح البحر..وأظهرت التحاليل أن عمر هذه المواد يعود لحوالى 4800 سنة وأنها بنسبة 99% سفينة نوح..بس خلاص.
تأجيل قرار اتحاد الكرة بخصوص مبارة الزمالك والمقاصة
**وبعدين بقى؟.. لجنة التظلمات باتحاد الكرة تؤجل اتخاذ قرارها النهائي بخصوص مباراة الزمالك والمقاصة للأسبوع المقبل، وذلك بسبب عدم الاستماع لأقوال نادي الزمالك حتي الآن.. قوم إيه بقى «الزمالك» يتظلم ويخلع قبل الإدلاء بالأقوال.. بصراحة يعني أنا مش فهمة أيوتها حاجة.
اقرأ أيضا:
