خبط بالعقل.. أحمد عز «صالحووووه».. من هتك قدسية الجامعة.. فلوس مصطفى وحسين فهمي حلال.. ومن شر وسواس «فيس بوك» الخناس.. الفايدة لما شطحت نطحت

 

1- أحمد عز تعبان ومش قادر يحضر الجلسات وعاوز يتصالح مع الدولة باي تمن..سبحان المعز المذل
والله احنا جبابرة... فاكرين الراجل اللي كانت كلمته في مجلس الشعب تتهز لها شنبات البلد... المهندس أحمد عز، أمين التنظيم في الحزب الوطني... الراجل قال في المحكمة: "أنا تعبان ومش بأقدر احضر الجلسات ومستعد أتصالح بأي تمن، المحكمة قالت له: "احنا هندرس الموضوع ده وهنبدي فيه الرأي ان شاء الله، سبحان المعز المذل.. وسبحان من يغير ولا يتغير... وكما قال السامري: "وكذلك سولت لي نفسي"

 

 2- بعد دكتورة الجامعة الي بترقص وبتلبس مايو طالبة تعتذر لحبيبها عبر يافطة في الحرم الجامعي..
تقريبا العيب في الجامعة مش في اللي فيها.. فاكريين من كام أسبوع كدة الهوجة إلي حصلت علي  دكتورة جامعة السويس "إلي كانت بترقص فوق سطح بيتها وإلي نزلت صورها علي الفيس وهي بالمايو البيكيني والجامعة كلها وقفت علي رجل وعاوزين يمنعوها عن التدريس ..النهاردة  قرر مجلس التأديب بجامعة السويس فصل 4 من الطلاب بعدما قاموا بتعليق لافتة غرامية لطالبة تحب طالب داخل الحرم الجامعي، وإللي أتكتب فيها  "أنا غلطت فى حقك كتير وبعتذرلك قدام كل الناس  أسفة يا مودى بحبك أوى"..هو أه الحب مش عيب ..والتعبير عنه بردو مش عيب..بس الجامعة ليها قدسيتها واحترامها إللي متسمحش بدة خالص.. الجامعة مش نادي يا ماما انتي وهي 

بس الغلط فين وعند مين؟.. هل الجامعة هي اللي مقلتش للطلاب ان الحرم الجامعي له قدسيته..ولا الأب والأم معلموش ولادهم إحترام الحرم الجامعي..ولا الطلاب مبقلهمش كبير، ولا بعض الدكاترة بوظوا بعض الطلبة... 

محتجين نقرب من شبابنا يا جماعة والله.. سواء كانوا في الجامعة او المدرسة ولو حتي اعتمدوا علي نفسهم وبقوا بيشتغلوا..الانحطاط الأخلاقي سببه ان بقى اللي بيربي بجد لا هو الأب ولا الأم، بقى التليزيون والنت ..خالو بالكم من تربية أولادكم يا جماعة.

3-الحق دايما بيرجع لصحابه..بعد استيلاء الهيئة العامة للاصلاح الزراعي علي ارض لحسين فهمي ومصطفي فهمي رجعلهم 3 مليون و736 ألف
الدولة تسترد الأراضي المنهوبة ودة طبعا بعد تدخل الرئيس في الموضوع..بس شوفت خبر غريب إن الهيئة العامة للإصلاح الزراعي استولت علي أرض زراعية مساحتها 99 فدان و15 قيراط و20 سهم في الفيوم..الأرض دية بتاعت حسين ومصطفي فهمي..بس الي بتاخدوا هيئة إصلاح الزراعي باليمين بتردوا وزارة المالية بالشمال.. قضت الدائرة 74 تعويضات محكمة شمال القاهرة المنعقدة بالعباسية اليوم بإلزام وزارة المالية بدفع 3 ملايين و736 ألف جنيه لصالح الفنان حسين فهمى ومصطفي فهمي تعويض عن الأرض اللي اتخدت، فده معناه اننا لو أخذنا أرض مش معتدى عليها من الأفراد، فممكن الدولة تلاقي نفسها في الآخر بتدفع تعويضات، ونعذب النسب ونخسر الدولة... طيب ممكن واحنا بنحسب الأراضي اللي الناس وضعها يدها عليه ناخذ بالنا ونستخدم مشرط الجراح مش سطور الجزار..... ممكن؟

4- بعد زيادة المصرفات الدراسية..علم ولادك زي أحفاد وزير التربية والتعليم
 زيادة مصروفات المدارس الخاصة..يعني أعلم ولادي فين؟.. مش كفاية أننا من أواخر الدول في التعليم..لا كمان نزود المصروفات علي أولياء الأمور ..هي الناس نقصة  والله حرام...أيه بقي الزيادة الي حصلت دية؟..المدارس التى تقل مصروفاتها عن 2000 جنيه زياداتها 11٪‏  والمدارس التى تبلغ مصروفاتها من 2000 لـ 3000 تزداد بنسبة 8٪‏ والمدارس التى تبدأ مصروفاتها من 7 آلاف فيما فوق تزداد 5٪..هو إحنا عندنا كام مدرسة خاصة وكام واحدة دولية؟..عدد المدارس الخاصة 6664 مدرسة أما المدارس الدولية 217.. 

وزير التعليم قال إن أحفاده بيتعلموا في مدارس حكومية.. طيب ما المفروض نأخذه قدوة لينا ونعمل زيه... 

بس رأيي ان والله مش فارقة كتير...  خاص أو عام أو غرق ... ربنا يسترها علينا وعلى ولدنا... 

5-فضيحة سودة علي الفيس بوك والحل أنه يتمنع حبة حلويين

صدمة في العالم كله بعد أن  أجرت صحيفة "الجارديان" البريطانية تحقيقاً يكشف عن القواعد السرية والمبادئ التوجيهية الخاصة بـ"فيس بوك" والتى تحدد مصير ما يصل إلى 2 مليار مستخدم على الموقع لأول مرة..وثائق مسربة تكشف الوجه القبيح لـ"فيس بوك".. موقع التواصل الاجتماعى يحرض على العنف ويشجع على الكراهية وينشر صور الاعتداء على الأطفال والحيوانات ويدعى عكس ذلك ويسمح بنشر مشاهد جنسية..طب إيه بقي؟؟..إيه الحل إلي هينقذ العالم من وسواس "الفيس بوك"..أنا راي يتمنع حبة حلوين كدة ... قول 3 شهور منها عم مارك زوكاربارك واصحابه يخسرولهم حبة فلوس حلوين..ومنها بردو نرجع نتلم في بيت واحد بدون مسك الموبيلات وقاعدة الفيس.. والحكومة بالمرة تخسر ممن شوية الشباب اللي طول النهار والليل بتنقوّذ عليها... 

أنا عن نفسي هعمل log out حالا لحد ما البرلمان يدخل ويشوفلنا حل.. وزي ما حضراتكم عارفين... مادام الموضوع راح البرلمان، يبقى نحس بالأمان... 

6-أنت مشفتش معرض "أهلا رمضان "ولا إيه؟..لما تشوفوا أبقي روح حارب في سينا براحتك يا معلم
 هو الصح فين؟؟ ومع مين؟ ..انتقد أحد النواب سياسة الحكومة الاقتصادية خصوصا فيما يتعلق بالزيادة المستمرة للأسعار وقال  "أقسم بالله ما هرشح نفسى تانى الواحد يروح يحارب فى سيناء  أحسن الناس مش هترحمنا بسبب زيادة الأسعار أنا بعد كده مش هقول لحد إنى نائب هقول لهم أنا مواطن مصري عادى"..الله عليك وعلي اللي حواليك ... بس أنا نفسي أعرف هل حضرتك هيكون لك نفس الرأي بعد ما رئيس الوزراء افتتح النهاردة "سوبر ماركت أهلا رمضان" وإللي من أهم شروطه زي ما الحكومة بتقول توفير السلع بأعلى جودة وبأقل سعر والحكومة دفعت 70 مليار جنيه لدعم السلع.. ده غير الـ 14 جنيه  للفرد علي بطاقات التموين في شهر رمضان.. يا سيادة النائب... فهمنا لو كنت فهمت والنبي... 

7-زيادة فائدة البنوك 2%..أفرح ولا أعيط 
علي النعمة ما حد فاهم حاجة..أمبارح بليل وفجأة  كدة بدون سابق إنذار لاقينا البنك المركزي طلع قرار برفع سعر الفائدة 2%..بس رئيس اتحاد الصناعات مسكتش وقال إن القرار مفاجئ  وجاء في وقت غير مناسب.. وقال إن دة هيكبد الصناعة المصرية من جديد وهيأثر علي البلد بشكل سلبي..

أوم إيه.... ؟ 

رد عليه  عضو مجلس إدارة اتحاد الصناعات ورئيس لجنة الضرائب والجمارك بالاتحاد، إن قرار رفع أسعار الفائدة البنكية على الإيداع والإقراض واحد من حزمة إجراءات مدروسة للإصلاح الاقتصادى. 

وأضاف أن القرار ده هيساهم بشكل كبير فى محاصرة ظاهرة "الاستيراد العشوائى"، والتقليل من الاستيراد بشكل عام، ومحاصرة فكرة "الدولرة"، وهو لجوء المواطنين لتحويل مدخراتهم الى دولارات، إذ يساهم القرار فى تشجيع المواطنين على إيداع مدخراتهم الدولارية بالبنوك، ما يصب فى صالح الصناعة المصرية، خاصة المشروعات الصغيرة والمتوسطة، التى تمثل 90% من عصب الاقتصاد.

وجهات النظر المتعددة مقبولة، بس لما بتشطح أوي كده، بتنطح فينا وما بنعرفش احنا رايحين فين. بس المهم إننا مستنين نزول الأسعار في  2018  زي ما محافظ البنك المركزي وعدنا.. ووعد الحر دين عليه..ولا إيه؟..

 

8- الدكروري ابنه دخلها بالواسطة

حددت الدائرة الأولى بمحكمة القاهرة للأمور المستعجلة، اليوم الإثنين، جلسة 12 يونيو المقبل، لنظر دعوى قضائية طالبت رئيس الجمهورية باستبعاد المستشار يحيى دكروري، من رئاسة مجلس الدولة بعدما رشحته الجمعية العمومية للمجلس كي يكون رئيسا لمجلس الدولة. ليه بقى.... ؟

أشارت الدعوى إلى أنه تم قبول تعين نجل المستشار "الدكروري"، مستشارًا بمجلس الدولة رغم حصوله على ليسانس الحقوق بتقدير مقبول دور أكتوبر عام 2004، وهو الأمر الذي يتعارض مع مبادئ النزاهة والعدالة والتجرد التي ينبغي أن يتسم بها القضاة بألا يغلبوا مصلحة أبنائهم الشخصية على حساب الآخرين الأكثر كفاءة والحاصلين على تقديرات جيد فما فوق، فتعينه في منصب قضائي بنفس الجهة التي يعمل بها والده مستشارا على حساب شخص آخر أكثر كفاءة. مستنيين حكم المحكمة، بس ... القضية كده هتفتح ملف أكبر وهو هل لازم ابن المستشار يبقى مستشار ولازم ابن الدكتور يبقى دكتور وابن الفنان يبقى فنان... والقانون بيقول ايه في الحكاية دي... 

9-دراسة بتقولك ان الشغل لوقت متاخر هيجبلك مشاكل في الثدي والبروستاتا
وأخيرا وليس بأخر.. هنقدملك نصيحة علي الماشي..  كشفت دراسة جديدة أن الأشخاص الذين يعملون في مناوبات عمل ليلية ربما يكونوا أكثر عرضة للإصابة بسرطان الثدي أو البروستاتا وذلك بسبب حدوث تغييرات هرمونية لديهم.. الصبح مفيش أحسن منه..حافظ علي صحتكم ومدمرهاش بسبب الشغل، وناموا كويس واشربوا مايه كتيير واقعدوا بالعافية....