خبط بالعقل.. «سبوبة بنت ترامب».. شلوط تركيا للديمقراطية.. هيا نحج لبيروت.. حسنة ماسبيرو القليلة.. حشرات الحاجة الحرشة.. مصر رايحة علي فين يا جدعان «مش كنت تسأل قبل ماتركب»

** تهافتت الفتيات على المتجر الإلكتروني، الذي عرض فستان إيفانكا الأسود المشجر لدرجة نفدت مبيعاته من الموقع بشكل كامل بعد ساعة تقريباً، من إبراز صورها وهي ترتديه لدى وصولها المطار،  يعود تصميم الفستان ذو اللون الأسود والمزين بأوراق الشجر الملونة إلى أزياء صيف وربيع 2017، وعرض بسعر يصل لنحو 1490 دولاراً .

ولم يعد الفستان متاحاً على المتجر الإلكتروني، الذي عرضه من مجموعة سيدريك شارلييه "Cedric Charlier، لنفاد الكمية طيلة الساعات الماضية وحتى لحظة نشر الخبر مساء أمس السبت، وفقاً لما نقلته صحيفة عكاظ السعودية اليوم الأحد عن وسائل إعلام أميركية.

بنت ترام بدي عرفت تجيب السبوبة منين، هي تطلع لها في كل زيارة خارجية بفستانين تلاتة والبنات تتجنن وتشتري والشركات المنتجة تبيع وهي تقبض.. عملية نضيفة مية المية.

2 ** شعب ميجيش غير بالشكم..انتخب حزب العدالة والتنمية  الرئيس رجب طيب أردوغان رئيسًا جديدًا له..طب دة معناه إيه إن أردوغان هو الحاكم الناهي في البلد..وطبعا محدش هيقف في وشه علي طول هيتفرم بدون تردد.. وكما حصل تغييرات دستورية لتوسيع صلاحياته الرئاسية، أصبح كمان زعيم حزب الأغلبية واللي بيعارضه بالشلوط على طول، يعني كدة الشعب لابس فيه هو وحزب العدالة والتنمية يعني الإخوان.."ألبس يا شعب عشان خرجيين بايي"، وبعدين يتخانقوا معانا علشان شلنا الإخوان قبل ما يشيلوا الشعب كله من طريقهم، لا أراكم الله مكروها في شعب شقيق أبدا. 

3 ** دية فريضة يا جماعة والله..وزير السياحة يوافق على زيادة أسعار الحج السياحى عقب مطالبة الشركات العاملة، بمجال السياحة الدينية زيادة الأسعار لكى تتناسب مع الخدمات المقدمة للحجاج السياحة، أسعاره تبدأ من 46 ألف وأنت طالع يا معلم، يعني ربنا لما قال إن  فريضة الحج "لمن أستطاع إليه سبيلا" كان يقصد في سعره ولا في صحه الفرد، أصل إلي أنا دراسته طول عمري إنه عشان مناسك الحج شاقة، فميقدرش عليها غير إنسان صحته حلوة، لكن في الأيام ديه عرفنا إن الحج ملوش دعوة بالصحة، وله بس معاك فلوس ولا لاء، أنتو عرفين إن مصر أغلي دولة في أسعار الحج، ده أنا ليا أصحاب بيجوا يحجوا من كندا وأمريكا وينزلوا في نفس الفنادق اللي بينزل فيه المصريين ومع ذلك تكاليف الحج في مصر أغلي... طب ليه؟.. ديه فريضة مش سبوبة يا جماعة، احنا بنعملها عشان تسقط من علينا ونجدد روحانيتنا، ازي اتحولت الى تجارة بالطريقة دي.. أقولك أنا هطلع أحج من بيروت أصلها أرخص من مصر يجي النص

4**هل اللي بيحصل في قمة الرياض ده بجد ولا كلام مدهون بزبدة وهيطلع عليه النهار يسيح...زمان كنا بنقول ان بلطجية العالم (يعني الغرب لامؤاخذة) بيحموا محطة بنزين العالم (يعني دول الخليج لمؤاخذة)، كنوع من أنواع تبادل المنافع، لكن اللي بيتقال في قمة الرياض ده مش شكله شكل تبادل منافع بس، يظهر والله أعلم اننا بقينا أمام حالة من "تلاقي المصالح" ضد الإرهاب اللي طالنا وطالهم، وزي ما بوش الأب اتجنن واتدخل أكثر من اللازم وأوباما انسحب أسرع من اللازم، والاثنين كانوا غلط، يظهر ان ترامب واللي معه فهموا ان عليهم أن يعودوا الى المنطقة لإصلاح اخطاء آخر 15 سنة، المتغطي بأمريكا عريان صحيح، بس كمان، اللي مش هيتغطى بأمريكا اليومين دول ما فيش أمامه غير روسيا وإيران، الله يكون في عون العرب بختاروا ما بين اللي بيذبحهم وهو مبتسم واللي بيسرقهم وهو مبتسم..أمجاد يا عرب أمجاد.

5 *

أيوة عايزين بوابة لإزالة التعديات ولتسجيل التعديات... فكرة حلوة أوي.

أعلن اللواء خالد سعيد محافظ الشرقية إنطلاق نافذه عبر البوابة الإلكترونية لمحافظة الشرقية، بعنوان: «الشرقية تستعيد أراضي أملاك الدولة»، وذلك لمتابعة تنفيذ حملات الإزالة اليومية على أراضي الدولة المتعدي عليها واسترداد المنهوب منها.

وأضاف المحافظ، أن النافذه الجديدة بموقع المحافظة (البوابة الإلكترونية لمحافظة الشرقية)، ستقدم تغطية كاملة لحجم الإزالات المنفذه مدعومة بالصور والفيديوهات والبيانات و مزودة بالأرقام والإحصائيات السليمة عن موقف التعديات على أراضي أملاك الدولة وتنفيذ قرارات الإزالة الصادرة واسترداد الأراضي المنهوبة بمختلف مراكز وقرى ومدن المحافظة مشيراً إلى أن النافذه الجديدة ستستقبل البلاغات المقدمة من المواطنين بشأن التعديات الواقعة على أراضي أملاك الدولة.

أنا أحيي اللواء خالد سعيد على الفكرة ولا بد أن تقوم كل محافظة بعمل بوابة زي كده... بس لازم كمان البوابة يكون فيها مكان يقدر فيه الناس انهم يبلغوا عن التعديات...  لأن زي ما ازالة التعديات خير فالتعديات نفسها خطر لازم نبلغ عنه... والنبي كملوا جميلكم وكملوا طريق عمل الخير بطريق تاني لمنع الشر

6 ** قلعة قلاع الإعلام المصري، ماسبيرو عايش على تبرعات الشركات ليه.. خبر ظاهره الخير وباطنه الخلل 

ماسبيرو يتلقى المعونات من شركات وقنوات تهدي للتليفزيون المصري بجلالة قدره مسلسلات عشان تتعرض في رمضان..

هو مش زمان كان ماسبيرو  بينتج مسلسلات وكانت التليفزيونات الخاصة جوه مصر وبره مصر كانوا بيشتروا منه انتاجه ايه اللي حصل...

أزمة ماسبيرو ليست ازمة نقص امكانات... ولا أزمة عظم تحديات... دي أزمة اخفاق ادارات...

الحقيقة إن أزمة ماسبيرو هي ازمة مصر كلها... القضية في مصر ليست عظم التحديات ولا نقص الامكانات بقدر ما هي اخفاق الادارات...

7 **هاتلي حاجة "حرشة "جنب الأكل... آي... اسكت مش طلع فيها حشرات مقرفة .. الأخبار بتقول إن مباحث التموين بالفيوم  قفشت مصنع مخلل بدون ترخيص بقرية حرفوش يستعد لرمضان بمخلل  وضبطت الحملة 40 برميل مخلل تحتوي على حشرات وشوائب ورائحة كريهة..بس الحمد لله المباحث لحقت الموضوع في أوله ولحقتهم قبل ما يوزعوهم علي التجار والموضوع ينتشر في الأسواق.. أنا أعطي تفويض للدولة إنها تشعلق صاحب المصنع ده وكل اللي بيشتغلوا فيه من رجليهم أمام مصنع بير السلم بتاعهم ده، واللي معدي يديهم على قفهاهم ويأكلوهم من المخلل بتاعهم ده لمدة شهر كامل... ما هو طالما أن العقوبة غير فورية وغير رادعة يبقى هنفضل ندلع الفاسد والمفسد وتظل الأمور خاضعة للظروف... عقاب المذنب وردع المفسد من واجبات الدولة يا حكومة... ربنا يستر علينا من الفاسدين والمفسدين والمطنشين. 

اقرأ أيضا:

خبط بالعقل.. طلب بإقالة محافظ البنك المركزي بسبب لعبه بمشاعر المواطنين.. مرتضي منصور معاه مستندات وسيديهات «كالعادة».. اعملي زي أختك وفاء وقولي له تجوزني ودبسيه.. براءة حسين سالم من القضايا الـ «فشنك»

خبط بالعقل.. احتويها تصبح لك «روووقة» الرقيقة.. مشفش الانستجرام بتاعها خزقتله عنيه.. شرم ولا بيروت.. كفاكم تشجيع للسياحة.. لو مش عاجبك تحديد النسل خد الإخصاء