خبط بالعقل.. طلب بإقالة محافظ البنك المركزي بسبب لعبه بمشاعر المواطنين.. مرتضي منصور معاه مستندات وسيديهات «كالعادة».. اعملي زي أختك وفاء وقولي له تجوزني ودبسيه.. براءة حسين سالم من القضايا الـ «فشنك»
الخميس، 18 مايو 2017 08:06 م
- رئيس لجنة الإسكان يطالب بإقالة محافظ البنك المركزي: «بيخدع الشعب»
يا فرحة ما تمت خدها الغراب وطار.. طالب رئيس لجنة الإسكان بإقالة محافظ البنك المركزي ووصفه أنه لا يستحق بالجلوس على أعلى منصب مالي في البلاد لأنه بيخدع المواطنين.. طب ليه ده الراجل إدانا أمل وقال إن الأسعار هترجع زي زمان في 2018.. أصله طلع مش فاهم إن نجاح مصر خلال الـ 6 أشهر الماضية بدخول 8 مليارات دولار من 150 صندوقا استثماريا من أكبر الصناديق في العالم بتعني إن ده ديون على مصر وليست نجاحات.. والله يا سيادة المحافظ كان مفروض قبل ما تدينا أمل أننا هنقدر نعيش ونشرتي اللي نفسنا فيه كنت تعرف الفرق بين الإنجازات الديون.. دي الأسعار في مصر وصلت إلى المرحلة العالمية.. وإحنا في عرض رغيف العيش مع كيلو اللحمة.
- براءة حسين سالم من تصدير الغاز لإسرائيل والتصالح طلع في قضايا «زيمباوي»
ظهر الحق وزهق الباطل.. حسين سالم اتمرمط في المحاكم وهرب من البلد وفي الآخر أخد براءة.. «ليه بتزعجي الناس يا زينب»؟ أه أصله كان متهم بإهدار المال العام.. الله هو مين ما هدروش في النظام السابق هي جت عليه يعني؟
لا وكمان قالوا إنه متهم بقضية تصدير الغاز لإسرائيل بس الحمد أخد براءة.. «ربما يكون عدو عاقل أفضل من صديق مجنون».
هو مش حسين سالم دفع 75% من ثروتة عشان يعمل تصالح مع الدولة وتسقط من عليه جميع التهم.. إيه بقي قصة المحاكمات دي.. ولا وزارة العدل لم يصلها ما يفيد بإتمام التصالح وإسقاط التهم.. ولا التصالح كان بخصوص القضايا اللي في «زيمباوي».
- الحكمة من حريق العاصمة الإدارية: الطوب والجير والأسمنت من المواد سريعة الاشتعال
المصري معروف بجبروته وقوته.. بعد حريق قاعة المؤتمرات الجديدة بالعاصمة الإدارية الجديدة من كام يوم.. سيذكر التاريخ إننا أول شعب في العالم حرق العاصمة الإدارية اللي تحت الإنشاء.. ولكن ما هو الدرس المستفاد من هذه الواقعة؟ إننا عرفنا إن الطوب والجير والأسمنت من المواد سريعة الاشتعال.
- على طريقة وفاء الكيلاني.. أسهل طريقة لقلب الراجل كلمة تتجوزني وأنا بحبك «مش معدته»
«أسهل طريقة لقلب الراجل كلمة تتجوزني وأنا بحبك».. وإحنا اللي كنا فاهمين غلط إن معدته هي السر.. لكن الإعلامية وفاء الكيلاني ادتنا سر الخلطة.. وعرفتنا إزاي توقعي راجل في الجواز.. لما قالت لتيم حسن تتجوزني.. وهو رد عليها: «باقبل فورا حبيبة قلبي».. ومن هنا «الحب ولع في الذرة».. وربنا هدي سرهم وهيجبولنا ولاد وبنات.. وتوتة توتة خلصت الحدوتة.
- مرتضي منصور معاه مستندات توقف النشاط الرياضي في مصر.. سيديهاتكم ومستنداتكم معايا
أنا معايا سي ديهاتك ومستنداتك.. كلمة بنسمعها كتير من المستشار ورئيس نادي الزمالك مرتضي منصور.. وده اللي بيخلي الناس كلها تخاف وتقلق منه.. أحسن يفضحنا.. بس عمرك تخيلت أنه يبقى معاه مستندات توقف النشاط الرياضي في مصر..ده هو اللي قال كدة والله مش أنا.. وكل ده ليه؟ عشان تم إلغاء مبارة الزمالك والمقاصة في الدوري.. وراح نادي الزمالك رافع قضية على اتحاد الكورة مع إن مرتضى منصور أصلا مش معترف بيه وبيقول عليه إنه منحل بحكم محكمة.. بس بقي يا سيدي «وراحت نايمة».
- لو معكش بطاقة سارية مش هتتجدد ببناتك في التليفونات
جدد بطاقتك وخاف على تليفونك بتاع البيت من العين.. القائم بأعمال رئيس مرفق الاتصالات أصدر قرارا بمنع شركات الاتصالات من التعامل مع العملاء إلا من يملك رقم قومي ساري وليس منتهي وحتى الباسبور ممنوع... سيدي الفاضل المطلوب هو التحقق من الشخصية فقط لا غير والرقم القومي حتى وإن كان منتهي مش معناه إني النهاردة فاطمة وبكرة يسرا.. وشكل حضرتك نسيت حاجة مهمة إن جواز السفر الجديد بيحتوي على الرقم القومي وبيانات الشخص كاملة.. هي مش مرمطة وخلاص يا جماعة ارحمونا يرحمك ربنا «أنت ماعندكش إخوات مواطنين ولا إيه».
- هاكرز هتفضحنا وهتطلع كل بلاوينا
استر على نفسك يستر عليك ربنا.. فاكر مامتك لما كانت بتقولك أوعى حد يقولك تعالا أوديك لبابا وتروح معاه.. ولو صمم تصوت وتلم عليه الناس.. هي نفس الفكرة في موضوع الرسائل اللي هتجيلك على الفيس أو تويتر وكده.. أصل في «هكرز» قرصنة إلكترونية على 100 دولة منهم مصر والهجوم بيتم بعد إرسال فيروس على أجهزة المؤسسات التي تعمل بنظام التشغيل ويندوز.. وبيعمل تشفير الملفات الموجودة على الأجهزة.. ولا يتم إرسال مفتاح فك الشفرة إلا بعد دفع الفدية المطلوبة.. والله أسلوب بسيط وسهل وهيخليهم أغنياء في وقت قليل «بدل ما تطلع كل قازوراتك قدام الناس.. استر على نفسك وصوت براحتك».
اقرأ أيضا:
