خبط بالعقل.. احتويها تصبح لك «روووقة» الرقيقة.. مشفش الانستجرام بتاعها خزقتله عنيه.. شرم ولا بيروت.. كفاكم تشجيع للسياحة.. لو مش عاجبك تحديد النسل خد الإخصاء

**الفضا سر نكد الست المصرية، أطباء نفسيون يؤكدون أن  المرأة المصرية نكدية، والأكثر "كبتا وكآبة، وكرها للحياة.. لما نلاقي الطب النفسي بيقول كدة وطبعا الست المصرية متتوصاش بتثبت الكلام دة كل يوم.. عزيزي الزوج غمض عينك ثواني وافتكر صوت مراتك وهي بتقولك  خد الزبالة وإنت نازل.. وتبقي وقعتك بيضة  أقصد سودة لو نسيت.. هتلاقي بوز أكبر من كبري قصر النيل لحد ما تحس بغلطك وتصلحه بهدية حلوة.. خاليك مغمض عينك عشان لسة هقولك علي   حاجة تانية مهمة الله يكون في عونك..  أكيد هيبقي نهارك مش معدي لو قالتك إن في أوفر علي هدوم أو ماكياج ليها ومنزلتش معاها ياعيني عليك وعلي الي جابوك ياخويا.. إحتمال ميطلعش عليك صبح أصلا.. اسمع كلامها عشان تحافظ علي إللي في جيبك لأنك هتدفع كتير.. وأخر حاجة لأزم تعرفها إن الستات ألطف الكائنات..عاملها بحب وإحترام وإحتواء وتقديررررر هتبقي معاك  روقة إلي إنت بدور عليها...

*** السوشيل ميديا مفرقة عروق المحبة.. ايه يا بنتي اللي حصل بينك وبين علاء جوزك؟.. ولا حاجة هو اللي بدأ والله.. بصي لقيته بطّل يشوف الانستجرام ستوريز بتاعتي تخيلي هو فاكر أنا بعملها لمين لأمي يعني.. أكيد لأ طب سألتيه عمل كده ليه؟..لأ أنا قلت أردها له رحت عاملاه له أن فولو على الإنستاجرام" راح عاملي لي "أن فولو" على "تويتر".. رحت أنا عاملاه له "ان فولو" علي الفيس قام هو عمل لي "أن فريند".. قمت أنا فقعته بلوك..راح عامل لي بلوك عالواتس انا رحت عملت له بلوك علي التليفون..معرفش يعمل ايه بقى فيا راح كسر لي مناخيري.. قمت مخزفة عينه اليمين وخرمت طبلة ودنه.. قام هو زقني رماني من علي السلم وانا حامل في الخامس فسقطت.. قام بقى البوليس خدوه وإتطس تلات شهور على ذمة التحقيق.. دة حوار بين زوجة وصحبتها..يا نهار اسود هي السوشيل ميديا باقت السبب في الطلاق والضرب والإهانة بين الزوجين.. إحنا إزاي بقينا تافهين أوي كدة..عملت بلوك ولا أد ولا مشفش البوست ومعملش كومينت فين المشكلة..أكيد مش فاضي..ألتمس لأخاك 70 عذرا..يلا  سلام بقي لما أشوف خطيبي عملي كومنت ولا لاء عشان ألحق أعمله بلوك بلا قرف.

***بلا وكسة .. أوصى وفد مصر لدى منظمة الأمم المتحدة في جنيف، بريطانيا وهولندا بـ"الالتزام بالمعايير الدولية لحقوق الإنسان"، واتخاذ خطوات فعالة "لمكافحة خطاب الكراهية"... أصل إحنا السجون عندنا هايلة ومية مية فا بننقل لإنجلترا وهولندا تجاربنا..إحنا مشاء الله السجون عندنا بتتفتح والمساجين بتهرب فاكر يوم جمعة الغضب ولا نسيت..دة غير إن السجناء نفسهم مش حسين أنه سجن.. نصحتي أتفرج علي مسلسل "سجن النسا" وأنت هتعرف  إننا في بلد "الكوسة" أصل عزيزة في المسلسل كانت عايشة عيشة ملوك عشان "بترش"فلوس علي السجانات بقي وكدة.. كلمة من أخر السطر..لما نشوف بلاوينيا نبقي ننتقض  الناس..

***لا مؤأخذة دة تهريج.. إزاي إحتياطي الدولار إرتفع؟.. دة كلام محافظ البنك المركزي إمبارح، وإلي أكد  أن 2018 الأسعار هترجع زي زمان "يارب".. أن هقولك بقي "سر الخلطة"..لما احتياطي الدولار بالبنك المركزي يرتفع ب ١٠ مليار دولار.. والديون الخارجية ترتفع ب ٢٦ مليار يبقى دى فلوسنا ولا ديون علينا؟..وكمان  زيادة الاحتياطى والتحسن فى ميزان المدفوعات فعلا  نتج بالدرجة الاولى بس إزاي؟؟؟ عن طريق  المساعدات والقروض والمنح الأجنبية واستثمارات أموال ساخنة فى  الخزانة.. فعلا في تحسن فى الميزان التجارى و تحويلات المصريين فى الداخل والخارج من خلال القطاع المصرفى  بس دة "نتيجة تعويم الجنية"..عرفت بقي إن الدولة شغالة شغل من نار..وإن إحتياطي الدولار إرتفع إزاي...بس في حاجة يا سيادة المحافظ نسيتها وهي إن في  غياب للتدفقات النقدية حقيقية ناتجة ومستدامة من السياحة والتصدير والاستثمارات الأجنبية المباشرة..

*** الله وأكبر في عينكم..لاميس الحديدي وعمرو أديب  ميقدروش يستغنوا عن بعض أبدا.. راجل ومراته بيحبوا بعض إيه  إللي يزعل الناس..ولا دة حقد بقي عشان أنتي جوزك مرضاش  تيجبي فستان جديد في عيد ميلادك ولاميس عمرو جبلها.. ولا عشان عمرو عملها عيد ميلادها في مكان فخم وغالي وإنتي يا عيني كان أخرك حتة تورتة في البيت وعلي الضيق وجمدتوا باقي التورتة عشان تكفيكم الشهر...  الخلاصة إننا لن نتعلم ابدا عدم التطفل علي الحياة الشخصية للمشاهير فالاحتفال بعيد الميلاد ليس رجس من عمل الشيطان ..في الأخر كل سنة وأنتي طيبة يا لاميس وعقبال 100 سنة ويعيش عمرو وتدبيسه في فستان جديد ومكان غالي..أنا مش بحقد والله بس يا بختك..

***في ظل سفر وزير السياحة للفاتيكان لتنشيط السياحة الدينية وكدة.. شركة مصر للطيران رفعت اسعار السفر الداخلي زي الغردقة وشرم الشيخ والأقصر وأسوان..وسعر التذكرة تقريبا 3 ألاف جنيه..  طب إنت لو مكان حد مسافر  شرم الشيخ ولاقي إن سعر التذكرة زي سعر تذكرة بيروت هتعمل إيه؟؟..أنا لو مكانك طبعا هسافر بيروت أهو يبقي خرجت برة مصر وأتفشخر قدام الناس إني سافرت برة وأنتم لا وبنفس سعر تذكرة شرم.. يلا باي أنا رايحة أحجز لبيروت..

** حضرتك تحب إخصاء ولا تحديد نسل؟؟ جميع الاختيارات متوفرة عندنا وهنريحك خالص.. سمعت نائبات البرلمان إللي بينادوا بتطبيق قانون لاخصاء الرجل وأخري تطالب  بقانون لتحديد النسل.. أنت تعرف يعني إيه إخصاء أصلا؟؟..لو تعرف غمض عينك ولو متعرفش أبقي سرش علي النت وأنت تعرف المصيبة السودة إلي مستنياك.. أما بقي قانون تحديد النسل بيهددك إنك لو خلفت أكتر من 2.. الـ3 الدولة ملهاش دعوة بيه "قال يعني هي ليها  دعوة بالـ2 التانين"..ولا ملزمه بأكله ولا شربة ولا أي حاجة ..أقولك علي حاجة  إحنا بنخلف 2.6 مليون طفل كل سنة..يعني فعلا إحنا محتاجين للقانون دة  وبالأخص للناس الي متقدرش تصرف علي نفسها عشان تجيب عيال تسرحهم في الشارع.. بس في سؤال هنا  لو أسرة جابت العيل الـ3 إيه ألي هيحصل فيه..."بلا نيلة"..