طفولة يقتلها المرض.. آية: «هموت خلال شهر» (فيديو)

بملامح شابة، حفر الهم خطوطه على وجهها البريء تقف آية على جانب الطريق في بلدتها الصغيرة تتبع أثرنا، ولسان حالها يطلب المساعدة.

حالتها السيئة وبراءتها دفعتنا للاقتراب منها ومعرفة ما يخبئه هذا الوجه البريء، لتقص الشابة وهي تسخر من الحياة قصتها الحزينة، التي أوقعت جسدها في شباك المرض.

 «أنا مركبة قسطرة في وريد الرقبة، ولازم أشيلها آخر الشهر، وبالتالي مش هعرف أغسل الكلى، ده معناه إني هموت، لان مفيش وريد للغسيل» بتلك الكلمات بدأت آية تروي قصتها.

تقول آية: «أنا في آخر سنة بالدبلوم، مصابة بفشل كلوي، وعاملة عملية وريد صناعي في ذراعي وفشلت، والدكتور قالي إني محتاجة وريد صناعي جديد، 25  ألف جنيه».

وتضيف: «أبي على باب الله، بيشيل طوب مع البنايين، وأنا مركبة قسطرة في وريد الرقبة، ولازم أشيلها آخر الشهر، وبالتالي مش هعرف أغسل الكلى، ده معناه إني هموت، لان مفيش وريد للغسيل».

وتابعت: «غيابي عن المدرسة بسبب المرض، والسنة دى أخر سنة ليا بالدراسة، وهخرج من التأمين الصحى وحالة والدي المادية، خلتني فاقدة الحق في التأمين الصحي، ومش عارفة أعمل إيه، أنا مش عايزة أزرع كلى، أنا بس عايز اركب وريد صناعي عشان أعرف أعيش، لأني بقالي 4 سنين باغسل، وخلاص تعبت».