«قصير» أسيوط تصرخ: «فراغ صحي تام»
الجمعة، 05 مايو 2017 08:50 ص
حالة من السخط يعيشها أهالي قريتى القصير شرق النيل ،ووير القصير غرب النيل التابعتين لمركز ومدينة القوصية ، جراء الإهمال بالوحدة الصحية التي تخدم القريتين من عدم وجود طبيب متخصص وتحول الوحدة بعد المغرب لعيادات خاصة بطبيب الوحدة.
يقول زيان محمد : بالليل مفيش سرنجات و الدكاترة مش موجودين ،والدكتور متعاقد مش دكتور متخصص ، وأنا واحد من الناس كشفت امبارح والتمريض إلا مارحم ربي وجنبنا الجبل وقريتنا مصنفة قرية جبلية ، مفيش مصل عقرب ولا مصل حنش (ثعبان) والاطفال بيحصل لهم حالة إعاقة سمعية بسبب عدم إسعافهم.
ويضيف محمود محمد ،بنتي كانت تعبانة والدكتور معرفشي عندها أيه وقال لى وديها لدكتور متخصص واداني زجاجة كحة ، والدكاترة واخدة الوحدة الصحية تجارة.
ويتابع محمد خليل ،الوحدة هنا بيستخدمها الدكتور تجارة ، ويبدأ الكشف الخاص بعد المغرب والكشف ب 20 جنيها لأهالي القرية ويكتب لنا أدوية نجيبها
من بره.
ويشرح محمد غطريفي قائلا:أنا كان عندي حساسية في وجهي ،وجيت عند دكتور الوحدة فكتب لي برشام احتقان في الزور ،وجبت المشرط والبنج والمطهر على حسابى،وشغل نصب في الوحدة الصحية بدير القصير.
يضيف ممدوح علي :مفيش دكاترة بس فيه أدوية وبيتاجروا في البشر ،ولا يوجد طبيب أساسي ،والطبيب المتواجد هو طبيب نساء وتوليد وبيكشف علي الكل وهو مش تخصصه.
ويوضح عمر أبوعيطة :دلوقتي إحنا متواجدين في الوحدة الصحية بدير القصير ،والتمريض متواجد ولكن ملهوش دور واحنا قرية مصنفة جبلية و6 آلاف مواطن متواجدين شرق النيل ،بقرية القصير تحت الجبل ،لمسافة 3 كيلو مترا ، ومصل العقرب موجود ،لكن التمريض لا يستطيع صرف مصل العقرب ، والطبيب المتواجد هو طبيب نساء علي المعاش ، ولذلك عايزين طبيب يتواجد حتي الساعة الثامنة ليلا .
موضوعات متعلقة:
مدرسة بالجيزة تتحدى «التعليم».. تُحصل 3 آلاف جنيه من الطلاب مقابل التحويل
