تفاصيل مكالمة السيسي للاطمئنان على صحة عمرو أديب

قالت الإعلامية لميس الحديدى، إن الرئيس عبد الفتاح السيسى أجرى اتصالًا هاتفيًا بزوجها الإعلامى عمرو أديب، للاطمئنان على صحته، بعد تعرضه لوعكة صحية وإجرائه عملية فى القلب، متابعة: الرئاسة اتصلت بينا وأنا كنت قاعدة جنبه والرئيس بنفسه كلمه وعمرو رد عليه.

 وأضافت «الحديدى»، خلال اتصال هاتفى ببرنامج «آخر النهار»، المذاع عبر فضائية النهار «One»، : الرئيس قال له فيما معناه، يلا يا عمرو أنزل علشان ترجع تانى تقود العمل الإعلامي، وأنا وعمرو كنا سعداء بهذه المكالمة، مشددة على أن مكالمة الرئيس عبد الفتاح السيسى رفعت من معنويات عمرو أديب.

وتابعت «الحديدى»: مصر كلها كانت عندنا الوزير خالد عبد الغفار كان عندنا كل الوزراء، ودي صدقات العمر مش مجرد قعدات عادية، وعمرو أديب بخير ويحتاج لوقت بسيط للتمايل للشفاء، أنا سعيدة بكل الناس اللي بتسأل عليه وعلشان الدنيا تهدأ أنا بطمن الدنيا عليه، عمرو أجهد نفسه خلال الشهور الستة الماضية وهو بيقوم محطة كاملة وبرنامج مهم، وعمرو عندى أهم من هنا العاصمة وأى حاجة.

واعتذرت لجميع الصحفيين والزملاء الذين قاموا بالاتصال بها ولم تتمكن من الرد، قائلة: ووجوده داخل الرعاية المركزة مش علشان خطورة فى حالته ولكن للاستشفاء، هو زى الفل بس الأطباء فضلوا وجوده بالرعاية علشان زحمة الزيارات، هو كان عاوز ينزل الشغل بكرة ولكن إحنا عملنا عليه حصار والأطباء.

وشددت الحديدى، على أن زوجها عمرو أهم من تقديم برنامجها، قائلة: أنا بعتذر لجمهوري وبقول أنا هكون ملازمة ليه ومش هقدر أقدم البرنامج بتاعي، لأن دوري كزوجة أهم في هذه اللحظات من دوري كصحفية أو إعلامية، وكمان أنا مش هكون مركزة.