«العرجاوي» يطالب بإلغاء العلاج على نفقة الدولة وتطبيق التأمين الصحي الشامل

قال الدكتور أحمد العرجاوي، عضو مجلس النواب عن دائرة مركز أبوحمص وإدكو، وكيل لجنة الشؤون الصحية بالبرلمان، تعليقًا على إعلان مساعد نائب وزير المالية، بضخ 1،1 مليار جنيه لميزانية العلاج على نفقة الدولة، إنه من الأفضل ضخ هذا المبلغ للتأمين الصحي الشامل بدلًا من العلاج على نفقة الدولة.

وأضاف وكيل لجنة الشؤون الصحية بالبرلمان، فى تصريحات خاصة لـ«صوت الأمة»: «بدل ما يضخ الفلوس دى للعلاج على نفقة الدولة، يضخها للتأمين الصحى الشامل ويريحنا، إحنا محتاجين حاجات كلها بسيطة، ونبدأ بقانون التأمين الصحى الشامل، وبالتالى هنلغى العلاج على نفقة الدولة اللى منتش قادر تحكمها بالظبط، ومين المستفيد منها، والإجراءات بتاعتها مهما كانت غير محكمة، يعنى بتتفاوت من مكان لمكان».

وتابع: «قرار العلاج على نفقة الدولة لا يستفيد منه المواطن البسيط اللى محتاجه أكتر من المواطن اللى مش محتاجه، لكن قانون التأمين الصحى الشامل هيعالج كل المواطنين فى وقت واحد.. أنت دلوقت بتقول عندك 50 مليارًا، وأنت ناقصك 40 مليار، طب ما تجمع كل الفلوس دى وتدخلها وتبدأ فى قانون الصحى الشامل».

وأكد وكيل لجنة الصحة بمجلس النواب، أنه لو وافق البرلمان على قانون التأمين الصحى الشامل، لن نحتاج إلى العلاج على نفقة الدولة، وكل شخص سيؤمن عليه وفقًا للقانون.

وأشار النائب أحمد العرجاوي، إلى أن العلاج على نفقة الدولة يعالج المواطن من الأمراض التى لا يقدر على علاجها، قائلًا: «أنا مواطن من حقى على دولتى أنها تعالجنى على نفقتها زى التعليم مجانًا، ده فى أمراض وأدوية معينة لا تخضع للعلاج على نفقة الدولة».