بالفيديو.. أصحاب «الصفر» في نتيجة الثانوية العامة يتظاهرون أمام «التعليم».. البكاء والصراخ سيد المشهد.. الطلاب: «لو البلد مش عايزانا يمشونا».. وأولياء الأمور: «الوزير بيربي العيال بعد الثورة ضده»

نظم اليوم الثلاثاء، المئات من طلاب الثانوية العامة أصحاب «الصفر» في نتائج الامتحانات، وقفة احتجاجية أمام وزارة التربية والتعليم، وتقديم شكاوي لتعرضهم للظلم بسبب ما حدث من تسريبات وصعوبة الامتحانات، وشهد محيط الوزارة صراخ وبكاء شديدين من قبل طلاب الثانوية العامة، نظام حديث، وكذلك أولياء أمورهم.

وقال أحد طلاب الثانوية العامة، بمحافظة الدقهلية، «أنا لما دخلت أجيب نتيجتى من على النت، لقتنى جايب صفر كان هيحصلى حاجه معرفش ازاى حصل كده، انا لما حد بيجى يسألنى انت ناجح ولا ساقط مش عارف ارد اقول ايه، مش عارف اصلا هعيد السنه ولا لاء، واتفجئنا بعد ما النتيجه طلعت انى اتعملى محضر غش وشغب طول الامتحانات، وطبعا دا محصلش".

وأضاف آخر «حرام أمى دى تقعد كده تعيط وتنوح عليا، أنا عمرى كده ما هكون طالب محترم فى البلد دى لما أكون جايب أصفار، هما مش عايزينا ف البلد يمشونا، احنا اصلا تعبنا من البلد دى، بلد مبتحترمش التعليم، والبنى آدم أرخص ما فيها»

وأكدت إحدي أولياء الأمور «بنتي أثناء أداءها للامتحانات، تعرضت للمرض، ودخلت العناية المركزية في غيبوبة، وقدمت كافة الأوراق المطلوبة اللى تثبت أنها كانت مريضة، عشان يسمحوا لها بدخول إمتحانات الثانوية العامة، للدور الثانى».

وأضافت «أنا جايه بطالب بس إن بنتى تعيد إمتحاناتها عشان تعبانه ليه يجبولى الأمن و،يقولى امشى انا عملت ايه، انا عايزه بس ادخل اكمل ورق بنتى عشان تشوف مستقبلها، قولتلهم خدوا التليفون والشنطه وسبنى أكمل ورقها مرضيش ومشوني، وده ميرضيش ربنا، منهم لله».

وقالت أخرى «الوزير عاقب العيال ورباهم بعد ما عملوا الثورة، فقرر يسقط معظمهم، وأولياء الأمور هما اللى طافحين الدم وشقيانين، عايزين نفرح بالعيال نيجى نشوف النتيجه نلقيهم سقطوا، الوزير كده عاقبنا إحنا مش عاقب العيال بس»

وأوضحت إحدى أولياء الأمور من المرج ماحدث مع ابنها قائلة: «ابني بعد سنه كاملة من التعب والمذاكرة، لاقينا شهادته مكتوب عليها صفر بعد ما كان بيصعب عليه يفطر فى رمضان عشان يلحق بس يروح دروسه او يذاكر».

وأضافت «إحنا مش طالبين من الوزير غير درجات العيال مش أكتر العيال متفوقة وشاطرة إزاى يجيبوا أصفار فى كل المواد دى حاجة متتعقلش هما بيعقبوا الأهالى مش العيال والرئيس لازم يتدخل فى الموضوع دا، إزاى 40 طالب فى مدرسة واحده يجيبوا أصفار كده».