غلوشيات رمضانية #11 رمضان.. يكتبها عبدالله غلوش:مأمون وشركاه من غير لبلبة عامل زي بطولة اليورو من غير بنات في المدرجات.. هادي الجيار ممثل تحب تتفرج عليه في الأسطورة.. وصابرين 3باروكات في حلقة واحدة

#١١رمضان

- اوسطه مغفرة.
- بداية من اليوم ، ممكن تبطل تتابع اي مسلسل وتتفرج علي اخر حلقتين منه ومش هاتحس انه فاتك كتير.
- سميرة عبدالعزيز يادوب خرجت امبارح من العناية المركزة في " الخانكة " دخلتها النهاردة في "ابوالبنات".
- لكل واحد عجبته اعلانات البنك الاهلي وبيفكر ياخد قرض عشان يعمل مشروع براميل او زراير ، احب اقوله ان البنك المركزي زود الفايدة علي القروض ١٪ النهاردة.
- زي النهاردة السنه اللي فاتت محمد عادل كان واحد من نجوم رمضان ومشهد وفاته سواء في (طريقي أو استاذ ورئيس قسم) مصر كلها اتكلمت عنهم ، السنه دي رغم انه مشارك في ٣ مسلسلات ولا حد بيجيب سيرته.
- مش لازم يا جماعة عشان نتريق ونعمل افيه حلو نكتب اي كلام وخلاص .. الحقيقة ان ليلي علوي مكنتش خطيبة سعيد عبدالغني في "زوج تحت الطلب" لانها كانت طالعة في الفيلم متجوزه المعلم محمد رضا.
- ثانيا ليلي علوي ذكية ومستحيل تفكر تتجوز او تتخطب لابن احمد سعيد عبدالغني في اي عمل مستقبلا ، خاصة بعد ما احمد باعها في " هي ودافنشي" وسرق المستندات من بيتها ، ده غير ان احمد اساسا مخلف بنت ومعندوش اولاد.
- بالمناسبة دي شريف باهر كتب كتابه علي صفية العمري في "ليالي الحلمية" من شوية.
- مأمون وشركاه من غير لبلبة ، عامل زي بطولة اليورو من غير بنات في المدرجات.
- الاسطورة .. هادي الجيار ممثل تحب تتفرج عليه.
-الاسطورة .. اتحدي محمد سامي ينزل اي منطقة شعبية او عشوائية زي اللي بيتكلم عنها المسلسل ، ويلاقي واحدة عاملة حواجبها زي روجينا او باقي بطلات المسلسلات.
- الظهور الاول لحمدي الوزير في بنات سوبرمان ، والظهور الاول لمشيرة اسماعيل في الخانكة.
- كتير ممكن يستغربوا لما يعرفوا ان (المفروض) هشام سليم مشارك في بطولة مسلسلين السنه دي.
- مدير الادارة العامة للمرور : سعادة المواطنين بالغرامات المرورية تعطينا دفعة للاستمرار فيها .. امنعوا الضحك.
- درة كانت في برنامج علي الراديو النهارده ، بتقول للمذيعة تليفوني مش بيبطل رن من اول رمضان ، المذيعة قالت لها مكالمات تهنئة علي "الخروج وليالي الحلمية" اكيد ، ردت عليها : لأ عايزين ياخدوا رقم ظافر العابدين .. عجبتني صراحتها الحقيقة.
- اول مرة اخد بالي النهاردة في حملة محاربة الفساد من جملة ، الفساد لو كان بقصد او " بحسن نية" .. اللي هي ازاي يعني؟
- غياب بيومي فؤاد عن اي حلقة من نيللي وشيريهان ، المسلسل بيفقد نصف قوته.
- قناة الناس اول قناة دينية معتدلة علي التردد الارضي .. خطوة اتأخرت كتير.
- افراح القبة .. صابرين ، ٣ باروكات في حلقة واحدة.
- احمد فهمي اتقبض عليه في الميزان ، ومحمد كيلاني اتقبض عليه في ونوس.
- القيصر .. كمية الـ suspense اللي اتعملت في مشهد يوسف الشريف وهو بيعمل المكرونة ، تعادل كل مشاهد الاكشن والاثارة في الدراما السنة دي.
- - كلب ايه اللي محتاجينه يحرسكم وانا موجود .. مصطفي شعبان "ابوالبنات".
- كل واحد عايز يبقى أحسن من التاني ، مش عشان نفسه ولكن عشان يعرف يعايرك ازاي ؟ .. سلوي عثمان "سقوط حر".
- محدش السبب في تعاسة حد ، البني ادم هو اللي بيتعس نفسه بنفسه .. هالة صدقي "ونوس"
- ربنا يرحمك يا امي ويرحم امهاتنا جميعا ويخلي امهاتكم يارب.