«أمير طعيمة» للملحنين: بلاش تسرقوا نجاحكوا

وجه الشاعر امير طعيمة نصيحة لجيل الملحنين الشباب، وطالبهم بعدم الغضب منه نظرا لكون نصيحته تحمل جانب من القسوة،حيث وصف بعضهم ببناء نجاحه على كسرة قلب الغير.

ونشر طعيمة عبر حسابه الرسمى تغريدة قائلا « نصيحة لبعض الملحنين الجداد ومش عايز حد يزعل من كلامي بس انا بحب الناس يبقوا فاهمين بفكر ازاي عشان ما نحرقش جاز:
اي ملحن جديد بيبعتلي تيمة عشان أكتبها وبيبقي الكلام اللي عليها كلام حلو، اوعي تفتكر اني هفرح بلحنك وهكتبه لسببين: اول حاجة اني عمري ما بكتب علي كلام انا شايف انه حلو حتي لو ممكن يكون عندي احلي. ثانيا انت بتنزل من نظري وبشوفك حاجة من اتنين يا اما انتهازي ووصولي وبتبيع واحد موهوب وبيحلم زيك لمجرد انك عايز توصل بسرعة حتي لو علي حساب أحلام ممكن تكون بتحلموها سوا، او بشوفك مش فنان اصلا ومش فاهم ان الكلام ده لايق علي اللحن وعيب تغيره حتي لو شايف ان اسمي أكبر وممكن تكون علاقاتي أقوي.
مش عيب انك تحلم وتكون عندك طموح او حتي تكون مستعجل توصل، بس العيب انك تبني فرحتك علي كسرة قلب واحد تاني، واولا واخيرا كما تدين تدان.
لو سمحتم عاملوا ربنا وما تحطونيش ساعات في موقف اني أكون بأذي مشاعر حد حتي لو انا مش عارف، وفي النهاية لو ربنا كاتبلك تطلع هتطلع وفي نفس الوقت من غير ما تقتل أحلام حد غيرك من غير ذنب.
اي حد سمع لحن انا كتبته وكان كاتب عليه كلام حلو عايزك تكون متأكد اني يا اما ما سمعتش كلامك اصلا يا اما التيمة كان عليها كلام انا شايف فعلا انه مش حلو ومش لايق علي اللحن».