أحمد السيسى: تامر حسنى حقق لى كل أحلامى

بمجرد أن سمعت لجنة تحكيم «the voice kides» صوته سارعوا لاختياره رغم أن عمره لم يتجاوز الثمن سنوات، ولم يقتصر الانبهار على لجنة التحكيم فحسب وإنما حققت فيديوهات أحمد السيسى أعلى نسبة مشاهدة على الـ«يوتيوب» واستطاع أن يلفت أنظار كل المصريين قبل أن تأتى الصدمة بخروجه من الدور قبل النهائى.. عن رحلته مع «ذا فويس» والنجومية التى حققها مؤخرا يحدثنا أحمد السيسى.

من أول حد قالك إن صوتك حلو؟

- أول ما بدأت أغنى كان قدام ميس أسماء مدرسة الموسيقى بتاعتى فى المدرسة، وقالت لى إن صوتى حلو وخلتنى أشارك فى حفلات المدرسة، وأول حفلة شاركت فيها غنيت أغنية للأطفال اسمها «طبق السلطة»، وقتها لقيت حاجة تانية حلوة فيا وهى إن بعمل حركات تعبيرية وأنا بغنى ومن وقتها بقت بتخلينى أشارك فى الحفلات، وقالت لبابا وماما علشان يخدوا بالهم من الموضوع ده.

بتحب تحفظ أغانى لمين؟

- قبل كده كنت بحفظ أغانى الأطفال، لكن السنة اللى فاتت وأنا فى تانية ابتدائى بدأت أسمع عبدالحليم حافظ لأنى لقيت صوته عجبنى، وهو أكتر واحد بسمعله وقليل لما بسمع لحد تانى.

حافظ ليه أغانى إيه؟

- أول أغنية سمعتها ليه كانت «موعود» وحفظتها كلها، وكمان حفظت أغنية «أنا كل ما اقول التوبة»، وبحاول أحفظ دلوقتى أغنية «سواح».

من قدملك فى برنامج «ذا فويس»؟

- ميس أسماء لقيتها يوم بتتصل بماما وبتقولها على البرنامج ده وأنها عايزة تشتركلى فيه فماما وافقت وقالتلى وكنت فرحان أوى وخصوصا لما عرفت إنى هقف قدام تامر حسنى وأنا بحبه جدا وبحب أغانيه وكمان فنانين كبار زى نانسى عجرم وكاظم الساهر ومكنتش مصدق إنى واقف قدامهم.

أول أغنية غنيتها فى البرنامج كانت «دار يا دار».. أنت اللى اخترتها؟

- أيوه أنا، لأنى كنت حافظها كويس بس هما طلبوا مننا عشر أغانى فرشحت 10 واخترت فى الآخر دى.

إيه هما الـ10 أغانى اللى اقترحتها؟

- «موعود» و«راحوا الحبايب» و«قال جانى بعد يومين» و«أنا كل ما اقول التوبة» و«دار يا دار» ومش فاكر الباقى.

بصراحة.. كنت خايف فى أول مرة طلعت وقفت فيها على المسرح؟

- لا مكنتش خايف خالص، بالعكس وكانوا مستغربين أنى كنت واثق من نفسى علشان دى مش أول مرة أقف فيها على مسرح، ده غير إنى كنت عارف إن دى مسابقة لازم واحد بس اللى هيفوز فيها، وأنا كنت متأكد انهم هيلفولى وإنى هوصل للنهائى.

وليه اخترت تامر.. ولا علشان مصرى؟

- أنا مركزتش فى إنه مصرى ولا لأ، أنا اخترته علشان كنت بحبه من قبل البرنامج وكنت بسمع أغانيه.

بكيت لما خرجت من البرنامج؟

- لا خالص، أنا تفاجأت بس وبعدين بصيت لماما فلقيتها بتحركلى دماغها إن تمام مفيش مشكلة فمزعلتش، وماما قبل كده كانت قيلالى ان غالبا هيختاروا بنت وولد وكان الولد اختاروه أصلا فكان مفروض يختاروا بنت وده اللى حصل.

بعدما خرجت كنت شايف مين المفروض يكسب؟

- أنا كان نفسى إن جويرية المصرية هى اللى تكسب ومش لأنها مصرية، بس علشان أنا بحبها وصوتها حلو قوى وكمان من فريق تامر وكان نفسى فريق تامر هو اللى يكسب.

طب وشايف إن «لين حايك» اللى خدت اللقب كانت تستاهله؟

- أكيد علشان لين صوتها حلو وليها حضور بس كان نفسى جويرية أكتر.

قلت مع منى الشاذلى إنك كنت عارف إن لازم لبنانى اللى ياخد اللقب.. ليه قلت كده؟

- الناس فكرت إنى عارف حاجة وقلبوا الدنيا بس ده مش حقيقى، أنا كنت بس بخمن بدماغى زى أى حد بيتفرج ما بيقعد يخمن.

فى البرنامج تامر حسنى وعدك بكليب.. صورتوه ولا لسه؟

- أيوه صورته معاه هنا فى مصر، بس أنا مش لوحدى معانا كمان 15 واحد من فريق تامر اللى كان فى البرنامج، والمفروض أن يتذاع قريب.

سمعنا إن تامر هيخليك تمثل معاه فى فيلمه الجديد؟

- أيوه فعلا هو كلم بابا وقاله إن هو كان بيدور على طفل لفيلمه الجديد من زمان وأول ماشافنى قال هو ده اللى هيعمل معايا الفيلم بس مقالش أى تفاصيل لسه، قاله هنقعد مع بعض قريب.

اتعرض عليك كمان فيلم تانى.. إيه هو؟

- اتعرض عليا فيلم من المنتج أسامة طه بس لسه لحد دلوقتى معرفش أى حاجة عنه لأن لسه مخلصش كتابة، ولكن اللى بدأت فيه خلاص هو «مسرح مصر kides»، وهكون مشارك فيه مع سامح حسين وهى مسرحية استعراضية غنائية بمثل فيها وبغنى.

إيه تعليق سامح حسين عليك؟

- فى كل مرة بغنى فيها بيجى يبوس دماغى.

اصحابك عملوا معاك إيه لما رجعت المدرسة بعد البرنامج؟

- كلهم هجموا عليا وكانوا فرحانين بيا وكل الناس كانت جاية تتصور معايا حتى من المدارس التانية، وعملولى بانر كبير حطينه على المدرسة.

شاطر فى المدرسة ولا مركز فى الغنا بس؟

- شاطر وكنت جايب 99% السنة اللى فاتت، وأكتر مادة بحبها هى العربى لكن الحساب مبحبوش.

نفسك تبقى إيه لما تكبر؟

- نفسى أدخل كلية موسيقى وأغنى، وكمان أكون مدرب كرة قدم.

ليه مدرب كرة قدم؟

- علشان أنا بحب الكورة جدا، وأنا مشترك فى النادى الأوليمبى وبلعب مهاجم وكمان بلعب كورة فى البلاى ستيشن.

بتشجع نادى إيه؟
- بحب الزمالك بس علشان كل اصحابى كانوا أهلاوية وكنا بنقعد نتخانق مع بعض فقولتلهم مش هشجع نادى مصرى خالص وهشجع برشلونة علشان بحب ميسى.

ليه الزمالك؟

- مش عارف بس بابا وماما مش زملكاوية، خالى هو اللى زملكاوى جدا وماما بتقولى إنى بدأت اتكلم عن نادى الزمالك وأنا كان عندى 3 سنين.

عارف إن اسمك على اسم الرئيس عبدالفتاح السيسى؟

- أيوه عارف وفرحان بده جدا، وفخور إن اسمى على اسمه علشان أنا بحبه.

عندك إخوات؟

- عندى أخت واحدة بس اسمها شاهيستا أصغر منى بس هى مبتعرفش تغنى هى شاطرة فى الرسم بس.

هنشوف ليك ألبوم قريب؟

- نفسى أعمل ألبوم ويكون فيه أغانى للأطفال والكبار، علشان كله يسمعنى بس مش عارف ممكن أعمل ده إمتى، لسه مفيش حد قالى إنه هيعملى ألبوم.

ناوى تشارك تانى فى البرنامج؟

- أيوه أنا عايز أُشارك السنة الجاية، وواثق إنى هفوز إن شاء الله، وهحصل على لقب «the voice kids».