كريستينا أمير مصممة ملابس الحشاشين: التصميم أخذ 8 شهور والصباح أصعب شخصية

حقق مسلسل الحشاشين بطولة الفنان كريم عبد العزيز نجاحاً جماهيرياً كبيراً، لأنه عمل فنى مكتمل العناصر اهتم بأدق تفاصيل، حتى نجح في جذب عقول وعيون المشاهدين لعصر الحشاشين بداية من النص المكتوب حتى الصور المعروضة على المشاهد.

ومن العناصر التي ساعدت على نجاح العمل هو ملابس الشخصيات التي عبرت عنهم بكل دقة والتي كانت من تصميم كريستينا أمير، والتي تحدثت معنا عن بداية رحلتها في مجال تصميم الأزياء، حيث قالت:" أنا خريجة فنون جميلة قسم ديكور فنون تعبيرية، وتصميم ملابس للشخصيات الدرامية هو جزء من الدراسة، وبداية حبى لتصميم الأزياء بدءا من وأنا في سادسة ابتدائى فقررت اتجه لدراسة السينما وقدرت أحقق ده عن طريق التحاقى بكلية الفنون الجميلة، واللى شجعنى في إنى أحقق حلمى هي أمى اللى كان ليها دور كبير في اللى وصلت له".

وعن تصميمها لملابس شخصيات مسلسل الحشاشين وخاصة شخصية حسن الصباح، قالت كريستينا :"قرأت النص كويس وبعدين بنيت فكرة عن كل شخصية من شخصيات المسلسل، لأن كل شخصية لها أبعادها وخلفيتها اللى بتنعكس على شكلها الخارجي والنقطة دى أنا ركزت عليها، وراجعت مصادر تاريخية بحيث أقدر أوفق بين صفات الشخصية والملابس التاريخية اللى كانت منتشرة في الفترة دى، وده خد وقت منى لكن اللى ساعدنى أكتر هي دراستى وكمان المراجع اللى كان موفرها المخرج الدكتور بيتر ميمي والمهندس أحمد فايز ساعدتنى في تصميم الملابس وكمان تقسيم العمل بينا كفريق ساعدنى على تصميم الملابس وجهة الإنتاج كمان كانت متعاونة جداً معايا".

وعن أصعب تصميم ملابس لشخصية من شخصيات الحشاشين، قالت :"شخصيات المسلسل كلها صعبة وتقيلة وعايزة تركيز عشان كده كان تحدى بالنسبة لى ولما قعدت معاهم كنت خايفة خصوصاً أن ده أول عمل درامى ليا، لكن قبلت التحدى وكنت بشتغل بكل جهدى عشان أقدر أثبت نفسى في العمل، وأكتر تصميم كان صعب بالنسبة لى هو ملابس شخصية حسن الصباح لأنه بيظهر للناس إنه زاهد جداً ودايماً بيكلم السماء ومالوش علاقة بالدنيا، وفى نفس الوقت لازم يكون له هيبة ومرعب وكمان شخصيته عمالة بتتطور كل شوية وكنت بفكر إزاى أترجم كل ده في شكله وكذلك شخصية ألينار عشان أوصل لتصميم ملابس ومكياجها وشعرها المناسبة لها، وعشان كده الفنانة سوزان نجم الدين عملت أربع بروفات و ده كان أكبر عدد بروفات للممثلين نعمله عشان نوصل للوك بتاعها وهى الحقيقة كانت متعاونة جداً وكانت عايزة تعمل اللى يخدم الدور والدراما وملابس أولاد حسن الصباح يعنى الحسين شخصية عنيدة وصعبة وعنده خلفية عسكرية وكذلك شخصية الهادى".

وتابعت :"شخصية دنيا زاد أطورت كتير جداً، وتصميم شخصيتها قبل دخولها القلعة كانت من ابتكار مصمم الأزياء حسن مصطفى اللى كان بيشتغل قبلى في المسلسل لكن صممت ملابسها بعد كده وركزت بعد دخولها القلعة وتصديقها لزوجها ووفاة ابنها وحزنها عليه ولما رجعت أصفهان وإحساسها بالحرية شكلها هيبقى إيه وركزت على أن تصميمات ملابس شخصية برزك أميد وزيد بن سيحون متأثرة بصفاتهم يعنى برزك مؤمن وجاد وعنده خلفية عسكرية وشخصيته قوية، وده بان في ملابسه لكن سيحون كان فرحان بوضعه الجديد لكن جواه كان عايز يعيش طبيعى عشان كده كان بيهرب بالحشيش ومستهتر وده بان في ملابسه لأنه مرتبطة من جواه بالدنيا برا وكنت برجع لدكتور بيتر ميمى في كل حاجة، وهو كان بيركز في أدق التفاصيل ولما بكون مش متأكدة من حاجة تاريخياً برجع للمهندس أحمد فايز لأنه مذاكر جداً فترة المسلسل تاريخياً وكنت برجعله في كل حاجة عشان ننسق الشغل بين تصميمات الأزياء والديكور والصورة تطلع مكتملة".


وعن أنواع الأقمشة التي استخدمت في تصميمات شخصيات مسلسل الحشاشين، قالت :"الأقمشة كانت محدودة لأننا كنا مهتمين بالدقة التاريخية، فكان الكتان والقطن و التطريز لكن مش مطبوع لأن مفيش طباعة ظهرت وقتها وتصميمات الشخصيات أخدت منى 8 شهور شغل أما ملابس الجيوش فكانت تصميم محمود رخا واللى أشرف على تنفيذها حسن مصطفى ودكتور عمارة مصمم الأزياء والمجاميع تنفيذ منفذ الملابس أحمد كابوريا واستايلست محمود فكرى ".


وعن إكسسوارات المسلسل، قالت كريستينا :"الإكسسوارات كلها من تصميمى كنت برسمها وأنفذها في مصر القديمة وشارع المعز".

مسلسل الحشاشين ليس العمل الدرامى الأول الذى صممت كريستينا ملابس شخصياته ولكن كان لها أعمال أخرى حيث قالت :" أنا بشتغل من أيام ماكنت بدرس في الجامعة واشتغلت أزياء مسرح كتير جداً واشتغلت أفلام مستقلة واشتغلت شوية في مسلسل جودر مع مصممة الأزياء منى التونسى وقبلها اشتغلت معاها مسلسل مذكرات زوج وفيلم سكر والحقيقة أنا بعتبر الحشاشين هو اللى فتح لى باب أوسع ومجال حقيقى في الشغل ده وأتمنى تكرار العمل الدرامى اللى من النوع ده كتير، وجودر كمان مبهر والموسم الرمضانى كان قوى جداً".