تفاصيل لقاء إمام عاشور في برنامج «ع المسرح»: خطوة الأهلي الأفضل في حياتي وصعب الرجوع للزمالك

 

قال لاعب النادي الأهلي إمام عاشور، إن حياته لو كان لها اسم سيختار اسم «حدوتة كوميدية»، وذلك لأنه شخص يحب الضحك ويكره الاكتئاب موضحًا: «حياتي كلها عبارة عن ضحك وهزار وماليش في الاكتئاب ولو حصل بعرف أخرج نفسي منه».

 

وأضاف عاشور خلال استضافته في برنامج "ع المسرح" مع الإعلامية منى عبد الوهاب المذاع على قناة الحياة: «عمري ما قلقت من جمهورة الكرة المصري، رغم أنه جمهور صعب، لكني واثق في نفسي وواثق في إمكانياتي، ولما بنزل الملعب بكون مركز في شغلي بس، ومبحبش أركز في أي ضغوطات تانية».

 

وقال عاشور، إن كانت حياته مسرحية سيكون أجمل فصل فيها هو انتقاله للنادي الأهلي، وأصعب الفصول هو فترة الاحتراف الستة أشهر التي قضاها خارج مصر وعاد من بعدها مصابًا، مؤكدًا: «الدنيا مكانتش ماشية معايا هناك كويس ومكنتش عارف اتأقلم» ويعتبر الفترة التي قضاها في نادي حرس الحدود هي أهم فصول حياته.

 

 

وأكد إمام عاشور، أنه يركز فى عمله والتمارين ولا يهتم بأى شئ آخر، وبعرف أخرج بره المواضيع دى، وموضوع الجمهور وضغوطات الجمهور واخد فى مصر أكبر من حجمه، وبنزل الملعب وانا مركز فى شغلى ومحاولة التركيز فى فوز فريقى".

 

 

وأضاف إمام عاشور، كنت محتاج أنسى لما احترفت 6 أشهر ومكنتش الدنيا ماشية معايا بشكل كويس ومريض بظروف محدش يعرفها غير القريب منى ومقدرتش أتأقلم معاهم، وكان منها اللغة وخاصة عند تغيير المدرب، وكان نفسى أعمل حاجة وانا فى ميتلاند وجيت جون أمام سبورتينج لشبونة".

 

 

وأكد إمام عاشور، لولا إصابة إخواتى محمد وحازم كانوا كملوا فى الملاعب، ولو اتكلمت عليهم مش هقدر أديهم حقهم من هنا للسنة اللى جاية، وديما بينصحونى وكانوا معايا، لافتا إلى أنه فى ناس كتير وقفت فى طريقه وحاولت عرقلته، ومش عاوز أذكر أسامى، منهم مدرب مكنش مقتنع بى زى مدرب غزل المحلة، أكيد كان فى أسباب بس مش عارف إيه هى لأنى مكنتش مقصر فى حاجة".

 

 

كما أكد لاعب النادى الأهلى، أن أهم مرحلة فى حياته وكانت نقطة تحول هى أثناء لعبه فى نادى حرس الحدود، كان وشه حلو عليا، والناس عرفتنى منه وقدمت موسم كويس معاهم.

 

 

ولفت إلى أنه عندما حضر من الريف للمدينة كان عمره 19 سنة وكانت بداية للمستقبل والمشوار ولازم أركز فيه لمساعدة عيلتى اللى واقفين معايا".

 

 

تابع إمام عاشور، مببصش للشهرة والفلوس، ومش كل حاجة الفلوس، وانا كان قدامى حلم أوصله وبدور بعدها على الفلوس، وإن شاء الله ناخد السنادى بطولة أمم أفريقيا ونصعد لبطولة كأس عالم".

 

 

وتحدث إمام عاشور، عن زوجته وفضلها عليه وحبه لها قائلا:"إجوزت وانا عمرى 24 سنة ومراتى ربنا يخليهالى سند ليا، ومهما أتكلم عليها مش هوفى حقها، وقفت جنبى فى حاجات كتير وديما داعم ليا فى حياتى أو فى الملعب أو خارجه، وهى داعم وضهر وسند، وأمى فى حتة تانية".

 

 

وأضاف عاشور، والدتى شافت معايا صعوبات كتير لما كنت فى المحلة، وكانت معايا فى كل الأوقات ومش بتتفرج على الماتشات من خوفها عليا".

 

 

وتابع، "أنا صريح واللى فى قلبى على لسانى ومش بدارى على حاجة، ومندفع، والقرار اللى بييجى فى دماغى بعمله من أول فكرة، ومش بخاف على نفسى لأنى صاحب القرار، وبخاف على حلمى".

 

 

وقال عاشور إن من أكتر العيوب التي يراها في نفسه هو أنه متهور ومن الشخصيات التي تقوم بفعل أول قرار يأتي في تفكيرها، لكنه مع الوقت بدأ ويحاول علاج هذا الأمر، ويتعلم التأني وأن يُصبح أهدى بشكل أكبر من ذلك.

 

 

وذكر عاشور : «من زمان بروح لدكتور نفسي دايمًا، وهو بيساعدني كتير في حياتي، وساعدني كتير الفترة اللي فاتت دي وعلمني أكون ماسك أعصابي أكتر، خاصة في الملعب، وأنا اللي قررت أروح له من نفسي لأني بحب المغامرات».

 

وأضاف عاشور: «أول عيب في نفسي صارحته بيه هو إني عصبي وبالجلسات اتعلمت منه ازاي أخفف العصبية، ومنظومة النادي الأهلي علمتني أصلح حاجات في نفسي علشان أكون أفضل».

 

 

وقال عاشور عن أزمته السابقة مع اللاعب وليد سليمان، أنه كان بالفعل خاطئا في هذا الفعل الذي بدر منه، وقدم الاعتذار له أكثر من مرة وقبل رأسه أمام الجميع في مُباراة القمة، قائلًا: "غلطت في حقه واللي عملته مكانش يصح".

 

 

وعن أزمته مع المحلل الرياضي رضا عبد العال، قال إن رضا عبد العال موجود على الشاشات لأن الجمهور المصري يحب الضحك، وما يفعله رضا عبد العال غرضة الضحك والأفيه، والترند، قائلًا: «أنا بحب رضا عبد العال جدًا والله وبيضحكني جدًا وزي ما طلع اتكلم عليا اتكلمت عليه وقلت عليه هجاص واتشهر بيها».

 

 

وأكد إمام أنه من الصعب جدًا الرجوع مرة أخرى لنادي الزمالك، موضحًا أن قرار الانتقال للنادي الأهلي، لم يأخذ تفكير 1% منه، موضحًا: «صعب ارجع الزمالك لأني اتحطيت في مكان الناس فيه بتحبني وجمهور النادي الأهلي ربنا يعلم حبي ليهم، ونادي الزمالك لما رجعت من الاحتراف محدش فيهم قدرني ولا كانوا بيردوا عليا»، وتعليقًا على سؤال منى عبد الوهاب بأن جمهور الأهلي هتف وقال عنه «إمام مش عايزينه» رد وقال «والنهاردة بيقولوا ابن النادي».