تفاصيل أزمة الفنان مصطفى قمر والناقد طارق الشناوي ووصولها للقضاء

كشف الناقد الفني طارق الشناوي مقاضاة الفنان مصطفى قمر، على إثر أزمتهما الأخيرة بعد هجوم قمر عليه لانتقاده فيلمه الأخير أولاد حريم كريم، واعتبر طارق الشناوي أن رد مصطفى قمر بهذا الشكل يعتبر سب وقذف يؤدي إلى السجن، مؤكدًا أنه لن يسكت عن حقه ولن يتنازل حتى لو اعتذر له.

تصريحات طارق الشناوي

وتابع طارق الشناوي في لقاء تلفزيوني: هو بيشتم والتعبيرات دي بتدينه قدام الرأي العام والقانون ومش هتنازل عن حقي حتى لو اعتذر، لأن ده سب وقذف علني يؤدي إلى السجن وهفضل ورا القانون ولازم يعاقب على حالة الانفلات اللي هو فيها لأن مهما كان حالة الهزيمة اللي بيعشها لا يبرر له مهاجمتي.

واستكمل: كل اللي قلته يقع تحت سقف حرية النقد حتى كلمة رديء واحدة من التقييمات للأفلام، وكلمة المطرب فقد بريقه يقع تحت إطار النقد، ولما قلت إن الفنانات اللي اشتركن معه مش مطلوبات في السينما ده مش تقليل ده تقيم واقعي مش شايف شيء في اللي قلته غلط.

طارق الشناوي: إزاي تحكم إني ما شفتش الفيلم

ورد الشناوي على تصريحات مصطفى قمر الذي قال إنه لم انتقد فيلمه دون أن يشاهده، قائلًا: إزاي تحكم إني ما شفتش الفيلم، هل هو معايا 24 ساعة؟ ده من ضمن الأسلحة الفاسدة لأنها أسلحة مردود عليها لأن هرد عليه وأقول هل شاف أني ما شفتش الفيلم، ولو قلت رآي إيجابي هيتقال أني شفت الفيلم؟.

طارق الشناوي وخلافه مع مصطفى قمر

نفى طارق الشناوي وجود خلافات سابقة بينه وبين مصطفى قمر مثلما زعم الأخير، قائلًا: لم التق باللي اسمه مصطفى قمر على الإطلاق في مكان وده ادعاء وسب وقذف لأنه عاوز يوحي أن حصل خلاف بينا وأن انتقادي لفيلمه تصفية حسابات.

تفاصيل أزمة مصطفى قمر وطارق الشناوي

كان انتقد طارق الشناوي فيلم أولاد حريم كريم ومصطفى قمر ووصف أن العمل لا يمت للسينما وأنه أسوأ الأفلام والأعمال الفنية، ووصف قمر بالمطرب الذي فقد بريقه وهو الأمر الذي رد عليه قمر وهاجمه بشدة.

رد مصطفى قمر

على الجانب الأخر هاجم مصطفى قمر الشناوي قائلًا: هو أنا مش طلبت منك تبعد عني أصلًا وماتتكلمش عني علشان ماتتهزأش طيب أنت اللي جيبته لنفسك عموما ياللي اسمك طارق أنت كاتب كلام أهبل يدل للمرة المليون أنك ماشفتش الفيلم، وعموما اللي حيرد عليك جمهور السينما الحقيقي اللي دخل الفيلم اللي مالوش دعوة بالنفاق أو مصلحة أي فيلم تاني، فكرني كده شغلتك ايه، هي من أربع حروف بيتهيألي.

وتابع مصطفى قمر في تصريحات تلفزيونية: ما قدرش أسيب واحد في المهنة متخصص يطلع يقول مصطفى قمر فاشل.. إحنا نجوم وبنمثل بلدنا بفننا المحترم الراقي، متسائلًا: المفروض أحفر تربة وأقولكم موتوني.. وهاخد حقي بالقانون من كل اللي غلط فيا؟

مصطفى قمر والخلاف منذ 20 عاماً

وأكد مصطفى قمر أن هناك خلافات سابقة بينه وبين طارق الشناوي وانتقاده له يعد تصفية حسابات، إذ قال: خلافي أنا وطارق الشناوي منذ 20 عامًا.. والأسلوب اللي اتبعه مش مهني.

تحدث الفنان مصطفى قمر على انتقادات الناقد الفني طارق الشناوي لـ فيلم أولاد حريم كريم، ووصفه أن العمل لا يمت للسينما.

واستنكر مصطفى قمر في تصريحات تليفزيونية، وصف النقاد الفني طارق الشناوي لـ فيلم أولاد حريم كريم بـ فيلم لا يمت للسينما، متابعًا: بيقول إن الفيلم لا يمت للسينما.. يا نهار أسود طب والأستاذ علي إدريس المخرج ده يبعمل ايه.. بيبيع كفته؟

ولفت مصطفى قمر، إلى أنه لا يمانع من انتقاد طارق الشناوي لأعماله، مؤكدًا أن الأخير انتقده بطريقة غير لائقة متعمدًا، معلقا: هو ينقد براحته إنما يقول مصطفى قمر فاشل مينفعش بعد 35 سنة نجاح وأغاني و22 ألبوم و12 فيلم وحفلات جوه مصر وبره مصر، ازاي تسمح لنفسك تقول الكلام ده.

فيلم مصطفى قمر

وتابع مصطفى قمر: هل أنا عجوز يعني؟ أنا أصغر واحد في جيلي، وبعدين بيقول عليا قديم، أنا اللي قديم طب نحط صورنا جنب بعض مين هيبقى قديم فينا، وهو يقدر يقول كل حاجة هو عايزها بس بصراحة حاجة تضحك، باين أنه مستقصد العمل وهل هو شاف الفيلم ولا ماشفش الفيلم؟، هو ماشفش الفيلم، وبينقد وهو ماشفش الفيلم، غريبة أوي أول مرة أشوفها في حياتي.

تصريحات مصطفى قمر

وكشف مصطفى قمر، سبب انتقاد طارق الشناوي له باستمرار، موضحًا: من أيام فيلم الحب الأول وهو بينتقدني واتقابلنا في موقف ما وشكله اتقمص مني، ومن وقتها وهو طول الوقت يتكلم عن مصطفى قمر، ومينفعش هو يتكلم على مصطفى قمر كمطرب وهو مش مطرب، أنا دارس مزيكا وبلحن.