عايدة رياض: "أنا عقلانية واتعودت على الوحدة لكن نفسى أحب وأتحب.. ومحرم فؤاد كان غيور جدا"

حلت الفنانة عايدة رياض، ضيفة ببرنامج واحد من الناس، الذي يقدمه الأعلامي عمرو الليثى، على ثقناة الحياة.

 

وكشفت الفنانة عايدة رياض، خلال الحلقة، الكثير من تفاصيل حياتها الخاصة، وقصة زواجها من محرم فؤاد، وعلاقتها بأحمد بدير وحسن شحاتة، وعن أصعب سنوات حياتها.

 

بدايات عايدة رياض الفنية

 

وكشفت الفنانة عايدة رياض، عن بدايتها قائلة: "بدايتى الفنية من المدرسة، وكنت بطلة جمباز وبلعب بيانو، وكان عندى حفلة فى عيد الأم، وجاءت لينا مدرسة من فرقة الفنون الشعبية وشاهدتنى، وقالت لى إن هناك فرقة اسمها الفنون الشعبية".

 

وأضافت: "فقلت ليها يعنى إيه؟ فقالت لى شوفتى فريدة فهمى ومحمود رضا فى فيلم إجازة نصف السنة، هى دى الفرقة، وقالت لى فيه خبراء روس جايين مصر وعاوزين بنات فى سن 12 سنة، وأخدتنى أنا وبنتين من المدرسة، وروحت وقدمت فى الفرقة".

  

واستطردت قائلة: "وأنا مدربة تدريب روسي كنت ممكن أرقص أى رقصة شعبية فى العالم، وكان فى جولة فى بلغاريا وتشيكوزلوفكيا، ومشيرة إسماعيل جالها مغص، وإحنا هناك وكان فيه رقصة البمبوطية، وقولت للأستاذ كمال المخرج، أنا حافظة رقصة البمبوطية، وقالى تعالى بكره اعملى بروفة معايا، وهي مجموعة رقصات صعبة، ودينيس اللى جابتنى من المدرسة، وهى كانت صوليست الفرقة، وقعدت 15 يوم اعملها، وخفت ورجعت تانى، وما رقصتش البمبوطية لمدة 6 شهور".

 

وتابعت: "لما رجعت مصر، كنت عاوزه أرقص البمبوطية أمام ماما وبابا، فطلب من المخرج أعمل عرض بدل مشيرة مرة واحدة، فدينيس قالت لى لا إعملى مكانى أنا، واتصورت الرقصة بيا أنا ومشيرة".

 

 

 

عايدة رياض ومحرم فؤاد

 

سردت الفنانة عايدة رياض تفاصيل علاقتها بالفنان محرم فؤاد، وزواجها منه لمدة 13 عام، قائلة "تزوجت من محرم فؤاد، بعد تجربة حب فاشلة بسبب اختلاف الأديان، وكنت بعمل عرض فى مسرح عبد الوهاب فى الإسكندرية، وجاء محرم فؤاد وعمر خورشيد، وشافونى وأنا بعمل البمبوطية، وراح فى الاستراحة قال لمدير المسرح، هاتلي البنت دى، ورحت سلمت عليه و قالى يا عايدة أنا عاوزك تقدمينى فى حفلة بكرة فى المسرح هنا، وهنجيب بنت تانى معاكى، وتانى يوم جه عمر خورشيد، طلب منى إنى أقدمه، فلقيت محرم نده عليا قال لى، عايدة ملكيش دعوة بعمر انتى هتقدمينى أنا، ومدير المسرح قال لى ده معجب بيكى جدا، وعزمنا فى سان جيوفانى أنا وزميلتى".

 

واستكملت: "أنا نزلت بعدها مصر، ولم أكمل العرض وهو كل يوم يروح المسرح يسأل عليا، وبعدها بأسبوع كنت بعمل عرض فى مسرح البالون، ولقيت تليفون منه وطلب يعزمنى على الغداء، ولم أتخيل إنه معجب بيا وعاوز يتجوزنى، وأقول إزاى ده محرم فؤاد يعنى، ولحد ما جالى المسرح، وقال لى أنا معجب بيكى وعاوز أتجوزك، وطلبت منه مهلة علشان أكلم بابا آخد رأيه".

 

وعن الأسباب التي أدت لعدم استمرار هذا الزواج، كان منها عدم الإنجاب، وذلك علي الرغم من تمنيها الانجاب، معلقة: "هذا الأمر من عند ربنا وله حكمة فى ذلك وأنا ربيت ولاد إخواتى".

 

وأشارت عايدة رياض، إلي أن محرم فؤاد، مكنش يحكى كل حاجة، وهو فنان عظيم ورجل مصرى جدع، لكن مع العشرة اتصدمت فى بعض الأشياء ولم أشعر معه بالأمان، وكان البيت اللى قاعدين فيه إيجار، ولما تزوجنا قعدت فى البيت، وهو كان غيور وخايف عليا".

 

مؤكده أن غيرته الشديدة كانت من بين الأسباب التي أدت إلي عدم أستمرار زواجهم، قائلة: "بعد الزواج منعني محرم فؤاد من التمثيل"، إلا أنها عادت مرة أخري من خلال فيلم أحلام هند وكاميليا، قائلة: "الفيلم زود المشاكل بيني وبين محرم فؤاد، وكان متفق معايا أترك التمثيل بعد مشاركتي في فيلمين فقط، لكن بعد الفيلم عملت مسرحيات وابتديت أرجع البيت في وقت متأخر، ونتيجة لغيرته الشديدة ضربني علقة سخنة".

 

وقالت: "أخدت علقة سخنة منه أثناء الخطوبة فى لندن، بسبب الولد اللى كنت بحبه بعت حد من أصحابه لى فى لندن، لأنه كان داخل الجيش ومش ينفع يسافر، بعت لى حد من أصدقائه، وبعت خطاب لى على السفارة فى لندن على إنه أخويا، وجالى تليفون من صديق وبيطلب منى أرجع تانى ليه، ومحرم سمع المكالمة واتجنن وضربنى أمام صديقه اللبناني".

 

ولفتت إلى الغيرة التي كانت بين محرم وعبد الحليم حافظ، وقالت: "كان في غيرة فنية، وكان يقولى عبد الحليم بيعمل مقالب وحشة أوى فيا.. عبد الحليم دمه خفيف ومحرم صعيدي بياخد كل حاجة على قلبه".

 

حسن شحاتة وعايدة رياض 

 

وعن كابتن حسن شحاتة وهو زوج شقيقتها هدي، قالت عايدة رياض: "لما والدي أصيب بالفشل الكلوي كنت مزنوقة وعاوزة فلوس، ولم يقف محرم فؤاد بجواري، فتواصلت مع كابتن حسن شحاتة، وكان في دبى وأرسل لي 5000 دولار، ومن وقتها حسيت إني لازم أعمل فلوس تكون أمان لحياتي".

 

سجن عايدة رياض

 

وعن واقعة دخولها السجن، علقت الفنانة عايدة رياض، على قضيتها وقالت: "تعرضت للظلم في القضية التي دخلت بسببها السجن، الشرطة جت للبيت وقالوا لمحرم فؤاد، فيه بنت إحنا ماسكينها بتقول إنها معاها 100 دولار، والفلوس المزيفة دي بتقول إنها وخداها من عايدة رياض".

 

واستطردت قائلة: "الست اللى اتهمتني إني إديتها 100 دولار مزورة، طلعت زوجة مخرج، لما وصلنا للمديرية محرم فؤاد، اتفاجئ إن فيه مكالمة تليفونية من الست زوجة المخرج دي، بتقول لي إزيك وكلام عادي مفيهوش أي حاجة، وطبعا القضايا دي بيبقى فيها شهرين مراقبة.. فات 4 شهور، ومفيش حاجة، بس هما كانوا عايزين المكالمة دي بعد 4 شهور علشان يمسكوني".

 

واستنكرت عايدة رياض: "لما اتقبض عليا مكنتش حاسة بالدنيا، ولما رُحت المديرية كل واحد بدأ يألف، ويقول هما مسكوها إزاي؟ اللي قبضوا عليا 4 أفراد منهم واحد من مباحث الآداب، بس كان المفترض يقولوا إنهم واخدني من بيتي مش في وضع غلط، تعرضت لظلم مش بسيط، واتقال عليا حاجات مش كويسة ودي حاجة مش سهلة ومتتصدقش، ومحرم فؤاد كان معايا في المحكمة وماسابنيش".

 

 

وأضافت عايدة رياض: "طلعت بعدها إشاعات إني اتمسكت في فيلا وكلام ظلم في ظلم، وكان نفسي الناس تتحقق قبل ما يظلموني، ويرجعوا لمديرية الأمن ويعرفوا أنا كنت فين، والقصة كلها كانت متلفقة".

 

وتابعت: "محرم فؤاد اتخانق مع الظابط، وكنت ممكن أرجع على طول، ولكن الخناقة اللى عملها هي اللي مرجعتنيش.. بس هو كان عنده حق، ووقف اترافع عني في المحكمة، وكان في ضهري، وأيام الثورة ناس حقوقين كلموني وقالوا لي ارفعي قضية وخدي حقك، ورفضت وقولت لهم البلد في إيه وانتو بتقولو ايه".

 

وعن أكثر ما يضايقها علي السوشيال ميديا، قالت عايدة رياض: " بلاقيهم بيقولوا دي جايبينها من فيلا أو شقة مفروشة وحاجات رهيبة جدا في قضية القبض عليّ".

شائعة زواجها من أحمد بدير

 

وخلال اللقاء تحدثت الفنانة عايدة رياض، عن زواجها من الفنان أحمد بدير، وقالت: "كانت شائعة من أيام مسرحية تكسب يا خيشة وكنت هسيب المسرحية بسببها، وأي اثنين في عمل واحد بتطلع عليهم هذه الإشاعات".

 

وانهت عايدة رياض حديثها قائلة: "أنا عقلانية واتعودت على الوحدة لكن نفسى أحب وأتحب".